Azərbaycandakı bank olmayan kredit təşkilatları (BOKT) 2024-cü ili 157,1 milyon manat xalis mənfəətlə başa vurub.
Azərbaycan Mərkəzi Bankının statistikasına görə, bu, 2023-cü ilə nisbətən 2,1 dəfə çoxdur.
12 ay ərzində BOKT-ların əməliyyat gəlirləri 438,3 milyon manat (illik müqayisədə 2,1 dəfə çox), əməliyyat xərcləri 176,1 milyon manat (53,8 % çox), xüsusi ehtiyatlara ayırmaları 64,3 milyon manat (9,9 dəfə çox),gözlınilməz gəlirləri 0,6 milyon manat (50 % çox), mənfəət vergisi ödəmələri isə 41,6 milyon manat (2,4 dəfə çox) təşkil edib.
Bu il yanvarın 1-nə BOKT-ların aktivləri 993,3 milyon manat olub ki, bu da 1 il əvvələ nisbətən 31 % çoxdur. Bunun 716,9 milyon manatı müştərilərə verilmiş xalis kreditlərdir. Son 1 ildə sektorun kredit portfeli 28,4 % böyüyüb.
Hesabat dövründə BOKT-ların öhdəlikləri 21,1 % artaraq 536,9 milyon manata, balans kapitalı isə 44,8 % artaraq 456,4 milyon manata çatıb.
Azərbaycandakı kredit ittifaqları ötən ili mənfəətlə başa vurub
Azərbaycandakı kredit ittifaqları 2024-cü ili 0,1 milyon manat xalis mənfəətlə başa vurub. Halbuki, kredit ittifaqları 2023-cü ildən 0,25 milyon manat xalis zərərlə çıxmışdı.
Ötən il kredit ittifaqlarının gəlirləri 2,2 milyon manat (əvvəlki illə müqayisədə 4,35 % az), xərcləri 1,3 milyon manat (eyni qalıb), xüsusi ehtiyatlara ayırmaları 0,8 milyon manat (33,3 % az), mənfəət vergisi ödəmələri isə 0,1 milyon manat (60 % çox) təşkil edib.
Bu il yanvarın 1-nə kredit ittifaqlarının aktivləri 12,6 milyon manat olub ki, bu da 1 il əvvələ nisbətən 3,1 % azdır. Bunun 10,6 milyon manatı müştərilərə verilmiş xalis kreditlərdir. Son 1 ildə sektorun kredit portfeli 3,6 % kiçilib.
Hesabat dövründə kredit ittifaqlarının öhdəlikləri 20 % azalaraq 2,8 milyon manata, balans kapitalı isə 3,2 % artaraq 9,8 milyon manata çatıb.
© Report
