Ukrayna prezidenti Vladimir Zelenski “Fox News”a müsahibəsində Ukraynanın daha böyük təhlükəsizlik zəmanətlərinə ehtiyacı olduğunu, Rusiya prezidenti Vladimir Putinin Avropadan qorxmadığını bildirib və ABŞ prezidenti Donald Trampı Ukraynanın yanında olmağa çağırıb.
Yanvarın 20-də vəzifəsinin icrasına başlayan Tramp Rusiya və Ukrayna arasındakı müharibəni tez bir zamanda dayandıracağına söz verib, lakin buna necə nail olacağını açıqlamayıb. Köməkçilər razılığa gəlmək üçün aylar çəkə biləcəyini bildiriblər. “Reuters”in verdiyi məlumata görə, Tramp Rusiya liderindən yayınan keçmiş Demokratik prezident Co Baydenin administrasiyasından fərqli olaraq Putinlə müharibənin dayandırılması ilə bağlı danışmağa hazır olduğunu bildirib.
Trampın noyabrda seçkilərdə qalib gəlməsi Moskvanın 2022-ci ilin fevralında Ukraynaya təcavüzünə son qoymaq üçün diplomatik həllə nail olmaq ümidlərini artırıb. Lakin bu, Kiyevdə tez bir zamanda sülh razılaşmasının Ukraynanın ziyanına ola biləcəyi ilə bağlı narahatlığı da artırıb.
“Biz ondan (Trampdan) ədalətin, Ukraynanın tərəfində olmasını istəyirik, Putin Avropadan qorxmur”, - Zelenski bildirib.
O, bəyan edib ki, Ukrayna Rusiya işğalını tanıya bilməz, lakin diplomatik həllə üstünlük verir.
Ağ Ev hələlik şərh verməyib.
Rusiyanın işğalından sonra Baydenin rəhbərliyi altında Birləşmiş Ştatlar Ukraynaya 175 milyard dollardan çox, o cümlədən 60 milyard dollardan çox təhlükəsizlik yardımı göstərməyi öhdəsinə götürmüşdü. Tramp dövründə yardımın bu sürətlə davam edib-etməyəcəyi bəlli deyil.
