Azərbaycan bu ayın sonunda Pakistanın baş naziri Şahbaz Şərifin Bakıya planlaşdırılan səfəri zamanı müxtəlif sahələrdə 2 milyard dollar dəyərində sərmayə yatırmaq üçün müqavilələr imzalayacaq.
Valyuta.Az xəbər verir ki, bu barədə Pakistanın “Dawn” qəzeti məlumat yayıb.
Sözügedən sərmayə razılaşmalarının əsasən neft və qaz ehtiyatlarının kəşfiyyatı, bərpa olunan enerji və enerji səmərəliliyi sahələrinə yönələcəyi gözlənilir. Bu isə iki ölkə arasında əməkdaşlığın daha da genişlənməsinə yol açacaq.
Hazırda Pakistandan olan nümayəndə heyətinə rəhbərlik edərək Bakıda səfərdə olan özəlləşdirmə, sərmayə və kommunikasiya naziri Əbdül Alim Xan bildirib ki, baş nazir Şahbaz Şərif bu ay Mərkəzi Asiya ölkələrinə səfər edəcək və bu çərçivədə Azərbaycanla Pakistana 2 milyard dollarlıq sərmayə qoyuluşuna dair müqavilələr imzalanacaq.
Alim Xan Pakistanda geniş sərmayə imkanlarının mövcud olduğunu vurğulayaraq, dövlətə məxsus müəssisələrin özəlləşdirilməsi prosesindən bəhs edib. O, həmçinin Azərbaycanın Pakistanın avtomagistral layihələri və digər infrastruktur təşəbbüslərində əhəmiyyətli rol oynaya biləcəyini qeyd edib.
Alim Xan səfəri çərçivəsində dünən Azərbaycanın baş naziri Əli Əsədovla görüşüb. Görüş zamanı ticarət, sərmayə və iqtisadi əməkdaşlığın gücləndirilməsi məsələləri müzakirə edilib. Bu müzakirələr keçən il Azərbaycan prezidentinin Pakistana rəsmi səfəri zamanı qurulan ikitərəfli əlaqələrin daha da möhkəmləndirilməsinə əsaslanıb.
Baş nazir Əsədov Pakistan və Azərbaycanın qardaşlıq münasibətlərinə malik olduğunu vurğulayaraq, iqtisadi əməkdaşlığın genişlənməsinin bu bağları daha da gücləndirəcəyini bildirib. O, Pakistanın son dövrlərdəki iqtisadi inkişafını yüksək qiymətləndirib və Azərbaycan tərəfindən sərmayələrin artırılması üçün tam dəstək veriləcəyini qeyd edib.
Alim Xan həmçinin Azərbaycanın energetika naziri Pərviz Şahbazov, nəqliyyat naziri Rəşad Nəbiyev, iqtisadiyyat nazirinin müavini Səməd Bəşirli və "Azərbaycan Dövlət Neft Şirkəti"nin ("SOCAR") prezidenti Rövşən Nəcəf ilə yüksək səviyyəli görüşlər keçirib.
Bu görüşlərdə qarşılıqlı ticarət, enerji layihələrinə sərmayə qoyuluşu və infrastrukturun inkişafı məsələləri, eləcə də Azərbaycanın Pakistanın avtomagistral layihələrinə marağı müzakirə olunub.
Azərbaycan rəsmiləri Pakistanın özəlləşdirmə proqramına, xüsusən də dövlətə məxsus müəssisələrə ciddi maraq göstərdiklərini bildiriblər. Onlar ticarət və sərmayə əlaqələrinin daha da genişləndirilməsi istiqamətində Pakistan nümayəndə heyətinə tam dəstək verəcəklərini vurğulayıblar.
Pakistan nümayəndə heyətinin tərkibində "SİFC"in koordinatoru general-leytenant Sərfraz Əhməd, neft və qaz katibi Momin Əli Ağa və digər rəsmi şəxslər yer alıb.
Energetika naziri Pərviz Şahbazov Alim Xan ilə görüşdən sonra bildirib ki, enerji sektorunda ikitərəfli əlaqələrin gücləndirilməsi ilə bağlı məhsuldar müzakirələr aparılıb. O qeyd edib ki, görüş neft və qaz, bərpa olunan enerji və enerji səmərəliliyi sahələrində əməkdaşlıq imkanlarını irəlilətmək baxımından mühüm addım olub.
A.Xan R.Nəcəf ilə keçirdiyi görüşdə isə qarşılıqlı əməkdaşlığın artırılması və ticarət əlaqələrinin genişləndirilməsi yollarını müzakirə edib.
Nazirin ofisi tərəfindən yayılan mətbuat açıqlamasında bildirilir ki, iki ölkə arasında imzalanmış müxtəlif anlaşma memorandumlarının icra vəziyyəti də nəzərdən keçirilib. Bundan əlavə, Pakistanın Mərkəzi Asiya ölkələri ilə ticarət dəhlizləri, dəmir yolu şəbəkələri və digər kommunikasiya vasitələri vasitəsilə əlaqələrinin inkişafı məsələləri də xüsusi müzakirə mövzusu olub.
Rəhim
