Rusiyanın "Spartak" (Moskva) klubunun akademiyasında məşqçi kimi çalışan Ramin Əsədovun Sportlife.az-a müsahibəsi
- Sizi klubda necə qarşıladılar?
- Komandada çox gözəl ab-hava var idi. Məni əla qarşıladılar. Uyğunlaşmağım çox zaman almadı. Yüksək səviyyəli mütəxəssislərlə çalışmaq çox xoşdur.
- Moskva klubunda ən bəyəndiyiniz məqamlar hansılar oldu?
- Akademiya məşqçiləri, koordinatorlar, inzibatçılar hamısı çox peşəkar, işə məsuliyyətlə yanaşan şəxslərdir. Məşqçilərə dəyər verdikləri hiss olunur. Bu məni çox sevindirdi.
- Yerli, yoxsa xarici klubda işləmək daha asandır?
- Fərqlər çoxdur. Burada həftədə bir dəfə test sistemi ilə imtahan olur. Ayda iki dəfə metodik dərslər keçirilir. Hər çıxdığın oyuna görə də pul verilir. Azərbaycan futbolunda belə bir şey görməmişəm.
- Sizcə, yerli klubların məşq sistemində hansı dəyişikliklər olmalıdır?
- Əgər biz də xarici klublar kimi inkişaf etmək istəyiriksə, çoxlu dəyişikliklər lazımdır. Məşqçilər ayda 1 və ya 2 dəfə testdən keçməlidir. İşlərində daha da peşəkarlaşmaq üçün dərslər almalıdılar.
- Gələcəkdə böyüklərlə çalışmaq istərdinizmi?
- Niyə də olmasın?! Özümü inkişaf etdirirəm və hazırda bunun üçün çox yaxşı yerdə olduğuma inanıram. "Spartak"dan öyrənəcəyim çox şey var.
- Gələcək hədəfləriniz nələrdir?
- Gələcək hədəflərim çoxdur. Daha da yaxşı nəticələr qazanmaq üçün öz üzərimdə işləyəcəyəm. Burada məşqçiyə çox dəyər verilir və məncə, bu, bir mütəxəssis üçün ən önəmli amillərdən biridir.
İdman.biz
