ABŞ prezidenti Donald Tramp şənbə günü sosial media vasitəsilə bildirib ki, Venesuela ABŞ-da saxlanılan bütün sənədsiz venesuelalı miqrantları, o cümlədən “Tren de Aragua” cinayətkar dəstəsinin üzvlərini qəbul etməyə razılaşıb.
O əlavə edib ki, Venesuela həmçinin miqrantların nəqliyyat xərclərini öz üzərinə götürməyə razılıq verib.
Venesuela hökuməti məsələ ilə bağlı hələlik rəsmi açıqlama verməyib.
ABŞ-ın xüsusi nümayəndəsi Riçard Qrenel cümə günü Venesuela prezidenti Nikolas Maduro ilə görüşüb. Görüşdən bir neçə saat sonra altı amerikalı girov azad edilərək ABŞ-a qaytarılıb.
Venesuelanın ABŞ-da qanunsuz yaşayan vətəndaşlarını geri qəbul etmək qərarı Trampın Kolumbiyanı sanksiya və tariflərlə hədələməsindən bir həftə sonra elan edilib.
Kolumbiya ilkin olaraq deportasiya edilən miqrantları qəbul etməyə razı olmayıb, lakin Trampın sanksiyalarla hədələməsindən sonra geri addım ataraq razılaşıb.
“Biz hazırda bütün ölkələrdən rekord sayda qanunsuz miqrantları çıxarmaq prosesindəyik,” – deyə Tramp bildirib. O, 2024-cü il prezident kampaniyasında qanunsuz miqrasiyaya qarşı sərt tədbirlər görəcəyini vəd etmişdi.
Tramp vəzifəyə gəldikdən sonra 20 yanvar tarixində qanunsuz miqrasiyaya qarşı sərt mübarizə aparmaq üçün bir sıra icra sərəncamları imzalayıb. Bu sərəncamlara ölkədə qeyri-qanuni yaşayan miqrantların rekord sayda deportasiyasını sürətləndirmək üçün tədbirlər də daxildir.
visiontv.az
