Bakı,TurkicWorld
İsrailin baş naziri Benyamin Netanyahu və ABŞ prezidenti Donald Tramp Ağ Evdə görüşərək Qəzzada atəşkəsin gələcəyini müzakirə ediblər.
TurkicWorld xəbər verir ki, Netanyahu Vaşinqtona atəşkəs danışıqlarının ikinci mərhələsi ilə bağlı müzakirələr üçün gəlib.
Görüş çərçivəsində Qəzzada girovların azad edilməsi və müharibənin davam edib-etməyəcəyi məsələləri əsas müzakirə mövzusu olub. Netanyahu və Tramp administrasiyası arasında əlaqələri gücləndirmək məqsədilə İsrailin strateji işlər naziri Ron Dermer danışıqlara rəhbərlik edəcək.
Netanyahu bu görüşdə "ip üzərindədir", çünki danışıqlara nəzarəti öz üzərinə götürməsi ikinci mərhələnin risk altında qalmasına səbəb ola bilər.
Digər tərəfdən, bölgədəki ərəb ölkələri ABŞ-a məktub göndərərək fələstinlilərin Qəzzadan çıxarılması planlarına etiraz ediblər. Məktub İordaniya, Misir, Səudiyyə Ərəbistanı, Qətər və BƏƏ xarici işlər nazirləri, eləcə də Fələstin rəsmiləri tərəfindən imzalanıb.
İkinci mərhələ danışıqlarının atəşkəsin ilk mərhələsindən 16 gün sonra başlaması planlaşdırılsa da, təxirə salınıb. Səbəblərdən biri Netanyahunun Tramp ilə görüşməsini gözləməsi kimi qiymətləndirilir. İkinci mərhələdə qalan girovların azad edilməsi, fələstinli məhbusların mübadiləsi və İsrailin Qəzzadan tam çıxması məsələləri müzakirə olunacaq.
Üçüncü mərhələnin illərlə davam edə biləcəyi və əsasən Qəzzanın yenidən qurulması və ölü girovların mübadiləsi ilə bağlı olacağı bildirilir.
