Milli Məclisin deputatı Hikmət Bababoğlu ötən gün parlamentin plenar iclasında səsləndirdiyi “Suriya bizim üçün mənəvi vətəndir” fikirlərinə görə tənqid edilməsinə, suriyalıların vaxtilə ermənilərə dəstək verməsi məsələsinin gündəmə gətirilməsinə münasibət bildirib.
Deputat Pravda.az-a açıqlamasında deyib ki, hazırkı tarixi mərhələdə qarşıda yeni bir Suriya var.
“Milli diplomatiyanın əsas vəzifələrindən biri düşmənləri dost etməkdir. Suriyanı Azərbaycana düşmən edən terrorçu Bəşər Əsəd rejimi bu gün artıq hakimiyyətdə yoxdur. Yeni bir hakimiyyət var və bu hakimiyyət Suriyanın dəyərlərinə sahib çıxan hakimiyyətdir. Suriyanın dəyərlərindən biri də etno-landşaftlığın həddindən artıq zəngin olmasıdır. Hələb şəhəri tarixən Hələb türkmənlərinin, Türkiyə ilə sərhəddə Bayır-Bucaq türkmənlərinin məskunlaşdığı şəhərdir. Kolanı dediyimiz ərazi Kolanı türklərinin vətənidir. Bu gün də həmin ərazidə yaşayırlar. Hazırkı Suriyada əhalinin 70%-i türk dilində danışmağı bacarır. Buna görə də Suriyanı dil mədəniyyətimizin coğrafiyalarından biri kimi görməliyik. Əgər diktator Bəşər Əsəd ermənilərə dəstək verdisə, o demək deyil ki, əbədi olaraq Suriya ilə düşmən olmalıyıq. Ermənilərə dəstək verən diktatura rejimi idi, Suriya xalqının burada heç bir günahı yoxdur. Bilirik ki, Suriya xalqının etnik zənginliyi içində bizim də aid olduğumuz türk superetnosunun elementləri mühüm rol oynayır. Suriyada inklüziv cəmiyyətin və hakimiyyətin bərqərar olunmasından söhbət gedir. Belə olan halda Bəşər Əsəd rejiminin erməniləri dəstəklənməsini Suriya xalqının erməniləri dəstəkləməsi kimi qiymətləndirə bilmərik. Bizim milli vəzifəmiz düşmən olan ölkələri dost etməkdir. Necə ki vaxtilə bəzi siyasətçilərin ucbatından bizə düşmən edilən Rusiyanı, yenə vaxtilə bəzi radikal siyasətçilərin sayəsində bizə düşmən edilən Çini dost etməyi bacardıq, Suriyanı da dost etməyi bacaracağıq. Azərbaycanın milli maraqları bunu tələb edir”, - o bildirib.
Aytəkin Qardaşova
