Suriya prezidenti Əhməd Şara prezident Rəcəb Tayyib Ərdoğanla görüşmək üçün Ankaraya gəlib. O, Ankarada prezident Rəcəb Tayyib Ərdoğanla görüşdə Suriyada yeni dövr, Suriya xalqına dəstək və PKK/YPG ilə mübarizə məsələlərini müzakirə edib.
Hafta.az-ın yazdığına görə, görüşdən sonra iki ölkə arasında münasibətlərin necə formalaşacağı və Abdullah Öcalanın çağırışının PKK/YPG-nin münasibətinə necə təsir edəcəyi maraq doğurur.
İstanbul Aydın Universitetinin doktoru Hazar Vural səfərlə bağlı fikirlərini açıqlayıb. Dr. Vural qeyd edib ki, Şaranın Səudiyyə Ərəbistanından sonra ilk xarici səfərini Türkiyəyə etməsi Dəməşqlə Ankara arasında yaxşı münasibətlərin davamı kimi şərh edilə bilər. Vural, “Terrorun aradan qaldırılması Suriyanin suverenliyi üçün çox vacibdir. Dolayısı ilə terror problemi Suriyanın təkcə iqtisadiyyatına deyil, həm də sosiologiyasına təsir edəcək mühüm məsələ kimi önə çıxır” deyib.
Müsahib bildirib ki, 911kilometrlik ortaq sərhədi olan iki dövlətin təhlükəsizlik prioritetləri üst-üstə düşür. Türkiyənin uzun müddətdir terror təşkilatına və orada yaradılmağa çalışılan süni terror quruluşuna qarşı çoxşaxəli mübarizəsi, siyasəti aydındır. Vaşinqtona diplomatik təzyiq göstərən bir Türkiyə var. Terror təşkilatı ilə bağlı Dəməşqin açıqlamaları da çox aydındır. Amma görünən odur ki, terror təşkilatı vaxt udmağa çalışır.
ABŞ prezidenti Donald Trampın izləyəcəyi siyasətlərin əhəmiyyətli olduğuna işarə edən Hazar Vural deyib ki, terror təşkilatı iki qonşu dövlətin onu Suriya ərazisindən tamamilə çıxarmaq üçün ortaq iradəsinə qarşı ilişib qalıb.
"Türkiyənin dəstəyi ilə Suriya hökuməti YPG-ni aradan qaldıracaq" deyən Vural əlavə edib: “Bu, ya zorla, ya da hərəkətlə ortaya çıxan mənzərədir. Terrorla uğurlu mübarizə təkcə hərbi əməliyyatlarla deyil, həm də sosial, iqtisadi, ideoloji və hüquqi metodları özündə birləşdirən çoxölçülü strategiya ilə mümkündür. Bu məqamda terror təşkilatının silahı yerə qoyma qərarını da yaxın günlərdə gözləmək olar. Digər tərəfdən, Suriya öz suverenliyini gücləndirdikcə və problemlərini həll etdikcə, terror təşkilatının işğal və istismar etdiyi torpaqlarda varlığına son qoyularaq suriyalılar üçün daha yaxşı gələcək təmin ediləcək. Bu nöqtədə Ankara ilə Dəməşq arasında “qazan-qazan” siyasətini yenidən görəcəyik. Ən böyük risk İsrailin təxribatı hesab olunur, çünki Tramp artıq hər hansı əlavə xərcdən qaçmaq istəyir”.
