Suriyanın keçmiş daxili işlər naziri (2011-2018) Məhəmməd əl-Şaar yeni hakimiyyət orqanlarına təslim olduğunu və onlarla əməkdaşlığa hazır olduğunu bildirib. Sabiq məmurun Suriyanın yeni administrasiyasının təhlükəsizlik qüvvələrinin nümayəndələrinin müşayiəti ilə etdiyi müvafiq videomüraciəti Əl-Cəzirə telekanalı yayımlayıb.
Sabiq nazirin sözlərinə görə, o, könüllü təslim olub və indiki hakimiyyətlə “açıq dialoq aparacaq”. "Mən Dəməşq rəhbərliyinə gedəcəyəm və əlimdə olanları təqdim edəcəyəm və suallara açıq cavab verəcəyəm", - əl-Şaar deyib. O, ölkədəki rəsmi həbsxanalara görə yalnız Daxili İşlər Nazirliyinin məsuliyyət daşıdığına da aydınlıq gətirib.
Əl-Şaar hərbi kəşfiyyat idarəsində müxtəlif vəzifələrdə, o cümlədən Tartusda hərbi təhlükəsizlik idarəsinin rəisi vəzifəsində çalışıb, daha sonra hərbi polisə rəhbərlik edib. 2011-ci ildə o, daxili işlər naziri təyin edilib və elə həmin il ABŞ və Avropa İttifaqının sanksiya siyahısına salınıb. Telekanalın məlumatına görə, o, həmçinin 2008-ci ildə Seidnaya həbsxanasında baş verən hadisələrdə və “Suriya xalqına qarşı digər cinayətlərdə” də ittiham olunub.
Ötən həftə Suriyanın yeni hakimiyyət orqanları əvvəllər ölkənin cənubundakı Dəra əyalətində siyasi təhlükəsizlik departamentinin rəhbəri vəzifəsində çalışmış Atef Nacibi (Suriyanın keçmiş prezidenti Bəşər Əsədin anası tərəfdən əmisi oğlu) saxlayıb.
Əziz Mustafa , Oxuməni.az
