Məlum olduğu kimi, bu günlərdə İranda səfərdə olan Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev İran prezidenti Məsud Pezeşkian və İranın Milli Təhlükəsizlik üzrə Ali Şurasının katibi Əli Əkbər Əhmədian ilə görüşüb.
Görüşdə iki ölkə arasında siyasi, iqtisadi əməkdaşlıq ; regional təhlükəsizlik məsələləri və Şimal-Cənub Nəqliyyat Dəhlizinin əhəmiyyəti barədə fikir mübadiləsi aparılıb.
İran Prezidenti Məsud Pezeşkian Azərbaycan Prezidentinin köməkçisi Hikmət Hacıyevlə görüşdə deyib: "İran Cənubi Qafqaz regionunda coğrafi sərhədlərin dəyişikliyinə və xarici qüvvələrin bölgəyə müdaxiləsinə qarşıdır".
İran siyasi rəhbərliyinin mövqeyi məlumdur. Lakin İran Azərbaycan ərazilərinin otuz il müddətində Ermənistanın işğalı altında qalanda susmuşdu. Tehran o zaman Ermənistana iqtisadi cəhətdən yardım edir, həm də siyasi dəstək göstərirdi. İndi İran rəhbərliyi bölgədə ərazi dəyişikliyinin əlahinə olduğunu bildirir.
Tarixdən məlumdur ki, 1918-ci ilə qədər Cənubi Qafqazda heç zaman erməni dövləti olmayıb. BÖYÜK GÜCLƏRİN təzyiqi ilə 1918 - ci ildə Ermənistan dövləti yarananda onlara (ermənilərə) Azərbaycan torpaqlarlndan 9 ( doqquz) min kvadrat kilometr ərazi ayrılmışdı.
Tarixi sənədlərdə qeyd olunur ki, "Batum müqavilələri"nə əsasən, Ermənistan dövləti yaradılarkən Ermənistan tərəfi Azərbaycan torpaqlarının onlara verilməsi müqabilində üzərinə bir neçə öhdəlik götürmüşdü. Bu öhdəliklərə əsasən, bundan sonra ermənilər Azərbaycana qarşı ərazi iddialarından imtina edəcəkdilər.
Lakin ermənilər məqsədlərinə çatandan sonra üzərilərinə götürdükləri öhdəlikləri birtərəfli qaydada pozdular və Azərbaycana qarşı işğalçılıq siyasətini davam etdirdilər.
Sonralar MOSKVANIN TƏZYİQİ İLƏ Sovet hakimiyyəti tərəfindən müxtəlif zamanlarda Azərbaycan torpaqları hissə-hissə Ermənistana hədiyyə edildi. Nəticə etibarilə Ermənistan SSR - nin ərazisi böyüyərək 29,8 min.kv. km. oldu.
Məhz buna görə, 1991-ci ildə SSRİ dağılanda Almatı Sazişinə görə Ermənistan ərazisi 29,8 min kv.km. göstərilmişdi.
İndi Ermənistanın baş naziri Nikol Paşinyan sülh danışıqlarında tez-tez Almatı Sazişinə istinad edərək bəyan edir ki, Azərbaycanın ərazisi 86,6 min kv. Km, Ermənistanın ərazisi isə 29,8 min kvadratkilometrdir. Lakin Nikol Paşinyanın bəyan etdiyi məlumat əsassızdır. Çünki Ermənistanın 1918-1920-ci illərdə mövcud olmuş dövlət ərazisi 9 min kvadratkilometr olub.
Hesab edirik ki, İranın, Rusiyanın və digər dövlətlərin hansı mövqedə olmasından asılı olmayaraq, rəsmi Bakı öz prinsipial mövqeyində qalmalıdır. Azərbaycan KOMMUNİST rejimi tərəfindən ermənilərə hədiyyə edilmiş torpaqların , o cümlədən Zəngəzurun geri qaytarılması üçün axıra kimi mübarizə aparmalıdır...
Qəvami SADIQBƏYLİ
