Bakı, 5 fevral, AZƏRTAC
Kerç boğazında mazut sızması Qara dənizin ekosisteminə ciddi ziyan vuraraq turist axının yenidən formalaşmasına gətirib çıxara bilər. Mütəxəssislər alternativ və daha təhlükəsiz istirahət zonaları kimi Xəzər dənizi və Fin körfəzinin populyarlığının artacağını proqnozlaşdırırlar.
AZƏRTAC Rusiya mediasına istinadla xəbər verir ki, rusiyalı ekspert Yevgeni Mixaylenko Kerç boğazında mazut sızmasından sonra Qara dəniz akvatoriyasında yaranan ekoloji vəziyyətin Anapa və Krım yarımadaları kimi ənənəvi kurort zonalarının turist cəlbediciliyini təhlükə altına aldığını söyləyib. O qeyd edib ki, ekoloji vəziyyətin pisləşməsi bu zonaları istirahət üçün təhlükəli edir.
“Ekoloji problemlər səbəbindən Anapa və Krım yarımadalarının sahillərindəki kurort əraziləri insanlar üçün təhlükəli olub. Ona görə də turistlərin bir hissəsi Qafqaz, Altay, Kareliya, Xəzər dənizi və Fin körfəzi sahillərini məzuniyyətlərini keçirmək üçün daha təhlükəsiz variant kimi nəzərdən keçirirlər”, - deyə Mixaylenko vurğulayıb.
Ekspert əmindir ki, turistlər daha münasib ekoloji mühiti olan alternativ istiqamətlər axtaracaqlar. Daha əlverişli regionlar olaraq o, cəlbedici təbiəti və inkişaf edən turizm infrastrukturu olan Xəzər dənizi və Fin körfəzini misal göstərib.
Mixaylenkonun fikrincə, istirahət edənlərin heç də hamısı Qara dənizə səfər etmir. Fəlakət zonasından uzaq olan Tuapse, Lazarevskoe və Soçi kimi kurort zonaları da populyarlığını saxlaya bilər. “Qara dənizin kurort ərazilərinə gəlincə, bu gün Tuapse, Lazarevskoe və Soçinin sahilyanı əraziləri daha təhlükəsiz zonalardır. Hesab edirəm ki, o ərazilərə tələbat daha çox olacaq. Çünki həm fəlakət zonasından kənardadır, həm də burada dəniz axını çirklənmiş ərazilər istiqamətindədir. Bununla yanaşı, iddia etmək olmaz ki, mazut sızması onlara təsir etməyəcək”, - deyə o vurğulayıb.
Rusiya Təbiət Nazirliyinin rəhbəri Aleksandr Kozlov qeyd edib ki, Anapanın ziyan görmüş çimərliklərinin bərpası 2026-cı ilin yay mövsümünün əvvəlinə planlaşdırılıb.
