Bu il İqtisadiyyat Nazirliyi yanında İqtisadi Zonaların İnkişafı Agentliyinin idarəçiliyindəki sənaye zonalarında 10-a yaxın müəssisənin fəaliyyətə başlaması gözlənilir.
"Report" xəbər verir ki, bunu Agentliyin İdarə Heyətinin sədri Seymur Adıgözəlov bildirib.
Onun sözlərinə görə, bu müəssisələr innovativ inşaat materialları, tütün məmulatları, yük avtomobilləri və s. məhsullar istehsal edəcək: "Onların hesabına 1 000-ə yaxın daimi iş yerinin yaradılması planlaşdırılır".
S. Adıgözəlov qeyd edib ki, ölkə Prezidentinin 12 iyun 2024-cü il tarixli Fərmanı ilə Hacıqabul Sənaye Məhəlləsinin əsasında Hacıqabul Sənaye Parkı yaradılıb: "Əsas məqsəd sahibkarların bu zonaya marağının yüksək olmasıdır. Daha əvvəl Sənaye Məhəlləsinin iştirakçısı kimi qeydiyyatdan keçmiş sahibkarların Parkın iştirakçısı kimi qeydiyyata alınması tamamlanıb. Artıq 8 sahibkar rezident, 2 sahibkar isə qeyri-rezident kimi qeydiyyatdan keçib".
