2021-ci ildə Kapitolidəki iğtişaşlarla bağlı işləri araşdıran Federal Təhqiqat Bürosu (FTB) agentlərinin işdən çıxarılması qurumun bir çox əməliyyatlarına, o cümlədən terrorla mübarizə ilə bağlı əməliyyatlarına zərər vura bilər.
“Report” xəbər verir ki, bu barədə NBC telekanalı məlumat yayıb.
Keçmiş və hazırkı məmurlara istinadən bildirilib ki, minlərlə belə agentin işdən çıxarılması - bəzi qiymətləndirmələrə görə, terrorla mübarizə üzrə agentlərin sayı 4 min nəfəri keçə bilər - FTB-nin terror təhdidləri ilə mübarizə aparmaq qabiliyyətinə ciddi təhlükə yaradır.
"Bu agentlər həm ABŞ daxilində, həm də "İslam Dövləti" və "Əl-Qaidə", HƏMAS və "Hizbullah" kimi xarici qruplaşmalardan gələn terror təhdidlərini araşdırırlar", - telekanal qeyd edib.
Həmçinin məmurların fikrincə, bu, FTB-nin terrorla bağlı olmayan digər əməliyyatlarına da təhlükə yarada bilər. Xüsusilə, bu, agentlərin ABŞ Prezidenti Donald Trampın ikinci administrasiyası ilə bağlı işləri araşdırmaq istəyinə təsir edə bilər. Bir çoxları repressiyalardan qorxaraq belə araşdırmalardan imtina edə bilər.
Daha əvvəl ABŞ Ədliyyə Nazirliyi FTB əməkdaşlarından Kapitolidəki iğtişaşları araşdıran bütün şəxslər haqqında ətraflı məlumat tələb edib. Bu, kütləvi işdən çıxarılmalardan ehtiyat edən FTB əməkdaşları arasında təşviş yaradıb.
