Ukrayna qoşunları Rusiyanın Kursk vilayətinin bir hissəsini ələ keçirdikdən sonra Rusiya prezidenti Vladimir Putin dedi ki, ölkənin Müdafiə Nazirliyinin əsas vəzifəsi işğalı dəf etməkdir. Bunun üzərindən altı ay keçir və rus ordusu hələ də Putinin bu tapşırığını yerinə yetirməyə çalışır.

Reyting.az “Bloomberg”-ə istinadla bildirir ki, Putinin Ukrayna ordusunu Rusiya ərazisindən çıxara bilməməsi, ABŞ prezidenti Donald Trampın müharibəni bitirmək üçün razılaşmaya çalışdığı bir vaxtda əlavə əhəmiyyət kəsb edə bilər.

Qeyd olunur ki, Rusiya qoşunları Ukraynanın şərqindəki döyüş meydanına davamlı irəliləyərkən, Kiyev potensial ərazi mübadiləsi üçün sövdələşmə vasitəsi kimi Kursk bölgəsini qoruyur.

Nəşr yazır ki, İkinci Dünya Müharibəsindən sonra Rusiya ərazisinin ilk işğalı “Putin üçün şəxsi uğursuzluqdur”, çünki onun daxili imici millətin maraqlarını müdafiə edən güclü lider olmasına əsaslanır.

Peterburq Siyasət Fondunun rəhbəri Mixail Vinoqradov bildirib ki, ümumiyyətlə, hərbi əməliyyatların effektivliyi gözlənildiyindən aşağıdır.

Eyni zamanda “Bloomberg” qeyd edir ki, döyüşlər yalnız Kursk vilayətinin kiçik bir ərazisinə təsir edir. Lakin Ukraynanın bir milyona yaxın əhalisi olan bölgəyə irəliləməsi indi müharibənin üçüncü ilində Putinin başlatdığı işğalın təsirini hiss edən ruslar üçün şok olub.

Öz növbəsində, Rusiya rəsmilərinin hesablamalarına görə, Kursk vilayətində 150 minə yaxın insan döyüşlər səbəbindən evlərini tərk edib. Dövlətin öz vətəndaşlarını müdafiə edə bilməməsindən də narazılıqlar artır. Məsələn, yanvar ayında yüzlərlə insan Kurskda küçələrə çıxaraq məmurların məcburi köçkünləri yerləşdirmək və ya itkin düşmüş qohumlarını tapmaqda onlara köməklik göstərmədiklərindən şikayət ediblər.

Kursk əməliyyatı Rusiyanın Ukraynanın şərqində irəliləyişini dayandıra bilməsə də, Kreml Ukrayna qüvvələrini bölgədən sıxışdırmaq üçün minlərlə əsgər göndərib.

“Bu, Putinə ağır təsir göstərə bilər, çünki Tramp ona müharibəni bitirmək üçün “sövdələşmə bağlamağa” təzyiq edir və bundan imtina edərsə, yeni sanksiyalarla hədələyir”, - məqalədə vurğulanır.

Rusiya onu da açıq şəkildə bildirdi ki, onun strategiyası Ukrayna və ABŞ-a Moskvanın şərtləri ilə razılaşmağa təzyiq göstərmək üçün hücumu davam etdirməkdir. Eyni zamanda rəsmilər deyirlər ki, Rusiya müharibəni daha 2-3 il davam etdirə bilər.

Londonda yerləşən strateji kəşfiyyat firması “Prisma”-nın baş analitiki Botha İliyasdeyib: “Putin prioritet vermək məcburiyyətindədir, çünki onun qüvvələri zəifdir və o, Kursk bölgəsindəki əraziləri geri almaqdan daha çox Ukraynadakı qazanclara diqqət yetirir”.

E. KAMAL