Yaponiyanın iki böyük avtomobil istehsalçısı Nissan və Honda arasında birləşmə danışıqlarının nəticəsiz başa çatdığı bildirilir. Bu barədə məlumatın Fevral atının ortalarında ictimaiyyətə açıqlanacağı bildirilib.
Marja.az xəbər verir ki, artıq Nissan yeni iş ortağı axtarmağa başlayıb. Nissan xüsusilə ABŞ-da yerləşən texnologiya şirkəti ilə əməkdaşlıq etməyi hədəfləyir. iPhone-ların istehsalçısı Foxconn (Hon Hai Precision Industry Co.) Honda və Nissan arasında danışıqların nəticəsiz qaldığının rəsmi elanını gözləyərək, yeni təkliflə çıxış etməyə hazırlaşır.
Şirkətin qlobal satışları yavaşlasa da, Şimali Amerika bazarı Nissan üçün ən mühüm bölgə olaraq qalır. Avtomobil sənayesi elektrik nəqliyyat vasitələrinə və avtonom idarəetmə texnologiyalarına doğru irəlilədikcə, avtomobil istehsalçıları texnologiya nəhəngləri ilə əməkdaşlıq etməyə üstünlük verirlər.
Honda ilə razılaşmanın pozulması Nissan üçün böyük risk yaradır
Honda ilə əməkdaşlıqdan imtina maliyyə cəhətdən çətin günlər keçirən Nissan üçün böyük risk yaradır. Şirkət məhsul çeşidinin köhnəlməsi səbəbindən ciddi endirimlər etmək məcburiyyətində qalır ki, bu da onun gəlirliliyinə mənfi təsir göstərir. Ötən ilin ilk yarısında xalis gəlirinin 94 faiz azaldığını elan edən Nissan, 9 min işçini ixtisar etməyi və istehsal gücünü 20 faiz azaltmağı planlaşdırır.
Buna baxmayaraq, yapon avtomobil istehsalçısı zavodlarını bağlamaq üçün addım atmadı. Bu vəziyyət Nissan-ın hərtərəfli restrukturizasiya prosesindən keçməsini istəyən Honda-nın qəzəbinə səbəb olub. Honda Nissan-ı tamamilə almağı və onu törəmə şirkətə çevirməyi təklif edib, lakin Nissan rəhbərliyi bu fikrə qəti şəkildə qarşı çıxıb.
Şirkətlər arasındakı razılaşmaya əsasən, Honda ilə eksklüziv danışıqlara xitam verildiyi təqdirdə hər bir tərəf 100 milyard yen (təxminən 657 milyon dollar) məbləğində xitam təzminatı ödəməkdən azad olacaq.
Nissan yeni strategiya müəyyən etməyə çalışır
Nissan-ın idarə heyəti yeni biznes tərəfdaşı tapmaq üçün danışıqların davam etdiyi bir vaxtda baş direktor Makoto Uchida və digər yüksək səviyyəli rəhbərlərdən hərtərəfli restrukturizasiya planı hazırlamağı xahiş edib. Planın fevralın 13-də dərc ediləcək şirkətin üçüncü rübün maliyyə nəticələri ilə eyni vaxtda açıqlanması gözlənilir.
Nissan, 2018-ci ildə keçmiş sədr Karlos Qonun həbsindən sonra Renault ilə ittifaqda qarışıqlıq yaşayıb və bu, idarəetmə böhranına səbəb olub. Şirkətin maliyyə çətinlikləri noyabr ayında illik mənfəət proqnozunu 70% azaltdıqda daha da aydın olub.
iPhone istehsalçısı yeni təklif hazırlayır
Bununla belə, Nissan-ın geniş istehsal şəbəkəsi və güclü brend dəyəri hələ də potensial investorlar üçün cəlbedici bir fürsət kimi qiymətləndirilir. iPhone istehsalçısı Foxconn-un ana şirkəti olan "Hon Hai Precision Industry Co." ötən dekabr ayında Nissan-ın payını almağa cəhd edib, lakin Nissan-ın Honda ilə danışıqları davam etdiyi üçün planı dayandırıb.
Bloomberg-in məlumatına görə, Foxconn Honda və Nissan arasında danışıqların nəticəsiz qalacağını gözləyərək, yeni təklif ilə çıxış etməyə hazırlaşır.
