Kolumbiya prezidenti Qustavo Petro kokain qadağası ilə bağlı açıqlaması ilə gündəmə gəlib. "Kokain viskidən daha pis olduğu üçün deyil, Latın Amerikasında istehsal edildiyi üçün qeyri-qanunidir" deyib Petro narkotiklərlə mübarizə siyasətinə dair Nazirlər Kabinetinin iclasında.
Hafta.az-ın “Columbia One”a istinadən yazdığına görə, Kolumbiya lideri iddia edib ki, əgər kokain bütün dünyada leqallaşdırılarsa, narkotik ticarəti ilə məşğul olan cinayətkar təşkilatlar asanlıqla məhv edilə bilər.
“Belə bir vəziyyətdə kokain şərab kimi satılır” deyən Petro, narkotik vasitələrin qanunsuz dövriyyəsi ilə mübarizədə istifadə edilən pulun uşaqların spirtli içki və ya siqaretə başlamasının qarşısını almaq üçün profilaktik siyasətlərə xərclənə biləcəyini əlavə edib.
Kolumbiyanın ilk solçu prezidenti Petro da elektron siqaretlərin qanuni olsa belə, insanların sağlamlığı üçün böyük təhlükə yaratdığını deyib.
ABŞ-dakı fentanil böhranına toxunan Petro bu ölümcül dərmanın Kolumbiyada istehsal olunmadığını xatırladıb. O, ABŞ prezidenti Donald Trampın fentanil böhranı ilə əlaqədar Meksikaya əlavə vergilər tətbiq etməsini də tənqid edib və sözlərinə belə davam edib: "Fentanil Amerikanın transmilli şirkətləri tərəfindən istehsal olunan dərman kimi ortaya çıxıb, sonra qazanc məqsədilə yaymağa başladılar. İndi meksikalıları günahlandırırlar, amma əsl günah öz sərhədləri daxilində olan şirkətlərdədir".
Kolumbiya dünyanın ən böyük kokain istehsalçısıdır. 2000-ci ildən bəri Boqota administrasiyası narkotiklərin qanunsuz dövriyyəsi ilə mübarizədə ABŞ-dan milyardlarla dollar yardım alıb. Bununla belə, Trampın xarici yardımı dayandırması və ABŞ Beynəlxalq İnkişaf Agentliyini (USAID) bağlamaq planı Kolumbiyada narkotiklərlə mübarizə siyasətinin gedişatını da dəyişə bilər.
Digər tərəfdən Trampın Kolumbiyaya qeyri-qanuni mühacir göndərməsi də iki ölkə arasında gərginlik yaradıb. Petro, ABŞ-dan deportasiya edilən kolumbiyalı mühacirləri daşıyan təyyarələri qəbul etməyəcəklərini, Tramp isə buna cavab olaraq ölkədən gələn məhsullara əlavə 25 faiz gömrük rüsumunun tətbiq ediləcəyini açıqlayıb. Boqota rəhbərliyi daha sonra geri addım ataraq mühacirləri qəbul edib.
