Kiyev, 8 fevral, AZƏRTAC
Ukrayna ilə Azərbaycan arasında ikitərəfli münasibətlər illərdir, hətta onilliklərdir ki, sıx dostluq, tərəfdaşlıq, eləcə də qarşılıqlı faydalı münasibətlərə malikdir. Ona görə də indi Bakıdan Kiyevə gələn bu cür yardım və dəstək çox vacibdir. Bu, xalqlarımız arasında dostluğun uzunmüddətli perspektivə malik olduğunu təsdiqləyir.
Bu fikri AZƏRTAC-a məxsusi açıqlamasında Azərbaycandan Ukraynaya elektrik avadanlıqlarından ibarət növbəti yardım karvanının göndərilməsini şərh edən ukraynalı siyasi ekspert Aleksandr Kovalenko söyləyib.
“Ən əsası odur ki, 2022-ci ildən, yəni Ukraynaya genişmiqyaslı işğalın başladığı vaxtdan bəri Azərbaycandan gələn humanitar yardım Ukraynanın enerji təchizatının dəstəklənməsinə yönəlib. Hamıya məlumdur ki, işğalçı qüvvələr Ukrayna ərazisinə müntəzəm, sistemli, kütləvi raket zərbələri endirir, əsasən enerji infrastrukturu obyektlərini hədəf seçirlər. Onların bərpası çox vacibdir. Bu, döyüş bölgəsindəki vəziyyətə təsir etmir, lakin dinc əhaliyə qarşı terrordur. Qışda, istilik mövsümündə mülki əhalinin həyatını əhəmiyyətli dərəcədə çətinləşdirir”, - deyə Aleksandr Kovalenko əlavə edib.
Ekspert vurğulayıb ki, Ukraynanın 2022-ci ildən bəri düşdüyü belə çətin şəraitdə Azərbaycanın dəstəyi əvəzsizdir.
Emil Hüseynli
AZƏRTAC-ın xüsusi müxbiri
Kiyev
