"UBS" strateqləri sənaye sahələrində elektrikləşmənin sürətlənməsi fonunda enerji və resurslara investisiya qoyuluşunun güclü perspektivə malik olduğunu bildirirlər.
"CIO hesablamalarına görə, qlobal iqtisadiyyatın elektrikləşməsi 2030-cu ilə qədər illik təxminən 3 trilyon dollar investisiya tələb edəcək", – "UBS" strateqləri qeyd ediblər.
Bu artım süni intellekt məlumat mərkəzləri, elektrikli nəqliyyat vasitələri və sənaye sahəsində elektrikləşməyə olan tələbatın yüksəlməsi ilə bağlıdır.
Beynəlxalq Enerji Agentliyinin ("IEA") məlumatına əsasən, 2024–2026-cı illərdə qlobal elektrik enerjisinə olan tələbatın illik 3,4% artacağı proqnozlaşdırılır. Bu, son on ilin orta göstəricisi olan 1,4%-dən xeyli yüksəkdir.
"UBS" hesab edir ki, bu struktur dəyişikliyi elektrikləşmə dəyər zənciri boyunca bir sıra investisiya imkanları yaradır. Şirkətin "Enerji və resurslar" portfeli elektrik enerjisi istehsalı, şəbəkə dayanıqlığı, enerji saxlama və elektrik infrastrukturunun qurulması üçün vacib materiallarla məşğul olan şirkətləri əhatə edir.
Süni intellekt sahəsindəki yüksəliş bu tendensiyanın əsas hərəkətverici qüvvələrindən biridir. "UBS"nin proqnozlarına görə, iri texnologiya şirkətləri 2025-ci ilə qədər məlumat mərkəzlərinin genişləndirilməsinə 250 milyard dollardan çox kapital xərcləri ayıracaq. Aparıcı şirkətlər bu sahədə illik 45%-dən çox artım gözləyirlər.
Süni intellekt modellərinin hazırlanması böyük enerji tələb etdiyindən, "UBS" hesab edir ki, süni intellektin geniş tətbiqi elektrik enerjisinə tələbatı daha da artıracaq və bu sahədə fəaliyyət göstərən şirkətlər üçün əlavə imkanlar yaradacaq.
Bu tendensiyadan xammal bazarı da faydalanacaq. "Elektrikləşmə və enerji keçidi səbəbindən mis, litium və alüminium kimi vacib materiallara olan tələbat artacaq", – "UBS" strateqləri bildiriblər.
"IEA"nın proqnozuna görə, bəzi metallara olan qlobal tələbat 2050-ci ilə qədər təxminən on dəfə arta bilər. Xüsusilə, misə olan tələbatın hər il əlavə 100 min ton artacağı gözlənilir ki, bu da məlumat mərkəzlərinin genişlənməsi ilə əlaqəlidir.
Təchizat zəncirindəki daralmalar və geosiyasi gərginliklər əmtəə qiymətlərini dəstəkləyə və xammal hasilatı ilə məşğul olan şirkətlər üçün investisiya perspektivlərini daha da gücləndirə bilər.
"UBS" yalnız ictimai bazarlarda deyil, həm də özəl kapital və infrastruktur investisiyalarında imkanlar görür. "Riskə dözümlü investorlar üçün biz məlumat mərkəzlərinin genişləndirilməsinə və enerji keçidi infrastrukturuna dəstək verən özəl kapital və infrastruktur investisiyalarını da tövsiyə edirik", – deyə şirkət nümayəndələri bildiriblər.
Süni intellektin inkişafı, sənaye sahələrinin elektrikləşdirilməsi və karbon emissiyalarının azaldılması elektrik enerjisinə olan tələbatın artmasına səbəb olur.
"UBS" investorları elektrik avadanlıqları, materiallar və kommunal xidmətlər sektorlarında diversifikasiya edilmiş səhmlərə, eləcə də məlumat mərkəzləri və enerji keçidi infrastrukturuna yönəlmiş özəl bazar investisiyalarına diqqət yetirməyə çağırır.
Rəhim
