Ərəb Dövlətləri Liqası (ƏDL) Fələstin məsələsini müzakirə etmək üçün fövqəladə sammit keçirməyə hazırlaşır. Bunu təşkilatın baş katibinin köməkçisi Hüsam Zəki də təsdiqləyib.
"Biz hazırda Fələstin məsələsini müzakirə etmək üçün Ərəb Liqasının sammitini keçirməyə çalışırıq, lakin gələcək görüşün tarixləri hələ müəyyən edilməyib", - Misirin "Əl-Qahirə əl-İxbariyyə" telekanalı onun sözlərindən sitat gətirir. Zəki vurğulayıb ki, təşkilat hazırda müstəqil Fələstin Dövlətinin yaradılmasına nail olmaq üçün “ərəb ölkələrinin və beynəlxalq ictimaiyyətin dəstəyini almağa” çalışır.
Şənbə günü səhər saatlarında “Asharq Al-Awsat” qəzeti mənbələrə istinadən Qəzzadakı vəziyyətlə bağlı Ərəb Liqasının sammitinin keçirilə biləcəyini yazıb. Nəşr iddia edib ki, sammitin əsas məqsədi “fələstinliləri Qəzza zolağından köçürmək planlarına qarşı fəaliyyətlərin əlaqələndirilməsi” və “anklavın yenidən qurulması planlarının” müzakirəsi olacaq.
Əziz Mustafa, Oxuməni.az
