Aktivist investor "Elliott Investment Management" neft nəhəngi "BP"də (BP.L) pay sahibi olub.
Valyuta.Az xəbər verir ki, bu barədə məsələ ilə tanış bir mənbə "Reuters" agentliyinə məlumat verib.
Mənbə payın ölçüsü barədə məlumat verməyib.
ABŞ mərkəzli "Elliott", "BP"ni transformativ addımlar atmağa çağıraraq səhmdar dəyərini artırmağa çalışır. "Bloomberg News"un dünən verdiyi xəbərə görə, "Elliott"un "BP"dəki payı "əhəmiyyətli" hesab olunur.
Həm "Elliott", həm də "BP" məsələ ilə bağlı "Reuters"in şərh sorğusundan imtina edib.
"Bloomberg"in məlumatına görə, aktivist investor "BP"nin dəyərindən aşağı qiymətləndirildiyini düşünür. LSEG məlumatlarına əsasən, "BP"nin bazar kapitallaşması təxminən 69 milyard funt sterlinq (85,62 milyard dollar) təşkil edir ki, bu da onun əsas rəqibi "Shell"in 161 milyard funt sterlinqlik dəyərinin yarısından azdır.
Aukinkloss investorların şirkətə olan etimadını bərpa etməyə çalışır. Yanvar ayında "BP" qlobal işçi qüvvəsinin 5%-dən çoxunu ixtisar edəcəyini açıqlayıb.
O, həmçinin 2023-cü ilin sentyabrında sələfi Bernard Lunin qəfil istefasından sonra yaranan etimadsızlığı aradan qaldırmağa çalışır.
Bir il əvvəl vəzifəyə gələn Aukinkloss, fevralın 26-da keçiriləcək investor günündə yeni strategiyasını təqdim edəcək. O, artıq sələfinin neft və qaz sektorundan uzaqlaşmaq strategiyasını tərsinə çevirmək istiqamətində mühüm addımlar atıb.
Böyük Britaniyanın neft istehsalçısı "BP", emal marjlarının azalması və texniki baxış işlərinin təsiri səbəbindən rübdən-rübə mənfəətinin 300 milyon dollara qədər azalacağı barədə xəbərdarlıq edib.
Yanvar ayında digər qlobal neft emal şirkətləri də yanacaq istehsalında marjların aşağı düşməsi fonunda yaxın perspektivdə mənfəətin artacağı ilə bağlı nikbin proqnozlar verməyiblər.
Qeyd edək ki, "BP" IV rüb və illik maliyyə nəticələrini fevralın 11-də açıqlayacaq.
"Elliott", təxminən 70 milyard dollarlıq aktivləri ilə ən nüfuzlu aktivist investorlardan birinə çevrilib. Şirkət son vaxtlar "Honeywell" (HON.O) bölünməsinə təzyiq göstərib. Fond, həmçinin London birjasında siyahıya alınmış "Anglo American" (AAL.L) şirkətində 3,2%-lik pay sahibi olub. Bu, "Anglo American"ın daha böyük rəqibi "BHP Group" (BHP.AX) tərəfindən potensial satınalma hədəfinə çevrilməsindən sonra baş verib.
Rəhim
