Moskvada 14 fevral Sevgililər Gününə maraq kifayət qədər aşağıdır. “SuperJob” insan resursları xidmətinin keçirdiyi sorğunun nəticələrinə görə, şəhər sakinlərinin 80 faizi ya bu günə əhəmiyyət vermir, ya da bitərəfdir. Üstəlik, 9 faiz Sevgililər Gününə "nifrət etdiyini" deyib.
Hafta.az-ın yazdığına görə, “Moskviçmaq” jurnalının keçirdiyi sorğuda iştirak edənlərin 19 faizi bu yad ənənəni bəyənmədiklərini bildirib. Maraqlıdır ki, bu özəl günü ən az sevənlər subaylar yox, evli cütlüklər olub. Bəzi iştirakçılar “Bizim əsl bayramımız Ailə, Sevgi və Sadiqlik Günü olan Müqəddəs Pyotr və Fevronya Günüdür” deyərək Rusiyaya xas alternativ bayrama üstünlük verdiklərini bildiriblər.
Sevgililər Gününü bəyənənlərin faizi olduqca aşağıdır. Sorğuda iştirak edənlərin yalnız 11 faizi bu günü çox bəyəndiyini, 8 faizi isə simpatiyasını ifadə edib. Ümumilikdə, Moskva sakinlərinin 53 faizi Sevgililər Gününə tamamilə biganədir. Qadınların kişilərə nisbətən bu özəl günü daha müsbət qarşıladığı müşahidə edilərkən, 35 yaşdan aşağı gənclər arasında bu günü qeyd etməyi bəyənənlərin nisbəti yüzdə 34 olub. Yaşı 45-dən yuxarı olan iştirakçılar üçün bu nisbət 15 faizə düşüb.
Aşağı maraq təkcə ictimaiyyətlə məhdudlaşmır. İş dünyası da bu il Sevgililər Günü üçün böyük kampaniyalar təşkil etməmək qərarına gəlib. Mütəxəssislərin fikrincə, rusların əksəriyyəti Yeni il xərclərinin təsirini hələ də hiss edir. Jurnal Sevgililər Gününün Rusiyada geniş qəbul edilən bir ənənə olmadığını yazıb. Əksər müəssisələr 23 fevralda qeyd olunacaq Vətən Müdafiəçiləri Günü və 8 Mart Beynəlxalq Qadınlar Gününə diqqət yetirməyə üstünlük verir.
