Litvanın baş naziri Gintautas Palukkas Avropa Komissiyasının sədri Ursula von der Leyen ilə görüşdən sonra ölkənin sualtı enerji kabellərinin qorunması üçün 30 milyon avrodan çox vəsaitə ehtiyacı olduğunu bildirib...
Poliqon bu barədə LRT kanalına istinadən xəbər verir.
O, bu kritik infrastrukturun qorunması üçün respublikanın ehtiyaclarını ödəmək üçün 32 milyon avrodan 34 milyon avroya qədər vəsait lazım olacağını bəyan edib.
"Ancaq maliyyə gələnə qədər biz öz maliyyə resurslarımızdan istifadə edə bilərik" deyən Palukkas bu məsələ ilə bağlı siyasi qərarın mümkün qədər tez qəbul edilməsinə çağırıb.
Baltikyanı ölkələrdə kabellərlə bağlı artıq bir neçə insident baş verib. Belə ki, yanvarın 26-da Baltik dənizinin dibi ilə Latviya ilə İsveç arasında çəkilmiş sualtı fiber-optik kabel, ehtimal ki, xarici təsir nəticəsində zədələnib. 26 dekabr 2024-cü ildə Finlandiya Sərhəd Mühafizəsi Finlandiyanı Estoniya ilə birləşdirən Estlink 2 sualtı elektrik kabelinin zədələnməsində iştirak etdiyi güman edilən Eagle S tankerini saxlayıb. Bundan əvvəl Baltik dənizində C-Lion1 və Arelion rabitə kabelləri və Balticconnector qaz kəməri zədələnmişdi. Estoniyanın xarici işlər naziri iddia edib ki, belə tez-tez ziyan Rusiyanın kölgə donanmasının hərəkətləri ilə bağlı ola bilər.
Poliqon.info
