Bakı, 10 fevral, AZƏRTAC
Çinli paleontoloqlar kanadalı həmkarları ilə birlikdə qədim sürünənlərin Şimali Amerikadan Asiyaya miqrasiyasına dair əlavə sübutlar tapıblar. AZƏRTAC “Sinxua” agentliyinə istinadla xəbər verir ki, tədqiqat qrupunun məlumatına görə, analiz üçün qiymətli materialın bitki ilə qidalanan ördəkgövdəli dinozavrların qalıqları olduğunu ortaya çıxaran fosillər aşkarlanıb.
Məlumatda bildirilir ki, söhbət 70 milyon ildən çox əvvəl Yer kürəsində yaşamış hadrozavrlardan gedir. 2009-cu ildə Quanqdonq əyalətində (Çinin cənubu) edilən kəşfin tədqiqatının son nəticələri elm adamlarına bu tarixdən əvvəlki heyvanların yaşayış yerlərinin coğrafiyası haqqında anlayışlarını genişləndirməyə imkan verib.
Çin Geoloji Universitetinin (Pekin) professoru Sin Lidanın izah etdiyi kimi, sözügedən fərdlər lambeozavrların alt ailəsinə - uzunluğu 7-9 metrə çatan və çəkisi 3-5 ton olan böyük ördəkgövdəli dinozavrlara aiddir. O qeyd edib ki, bu, Təbaşir dövrü üçün (145 milyon - 66 milyon il əvvəl) yeganə sübutdur və həmin eranın sonunda Şimali Amerika dinozavrlarının Asiya regionuna mümkün miqrasiyasını göstərir. Mütəxəssis dinozavrların kütləvi məhvinə qədər planetin müxtəlif yerlərində ekoloji şəraitin daha yaxşı başa düşülməsinə kömək edəcək gələcək tədqiqatların vacibliyini qeyd edib.
Alimlər bu fosillərin ölüm anında hələ tam yetişməmiş lambeozavrlara aid olduğunu müəyyən ediblər. Onların fəqərələrinin quruluşunun Şimali Amerikada tapılan oxşar sürünənlərin fosilləri ilə eyni olduğu müəyyən edilib. Hadrosavrların 1000-dən çox kiçik dişi var idi. Onlar musiqili truba çalmağa bənzəyən uğultu səsləri çıxararaq bir-birlərinə siqnal verə bilirdilər.
