Finss.az - Fransa Prezidenti Emmanuel Makron, ABŞ Prezidenti Donald Trampa Avropa İttifaqı iqtisadiyyatına zərər verməməsi və gömrük rüsumları tətbiq etməməsi barədə çağırış edib.
CNN-ə verdiyi müsahibəsində Makron, belə addımların Amerika Birləşmiş Ştatlarının öz maraqları ilə ziddiyyət təşkil etdiyini vurğulayıb.
Fransız lider bildirib ki, Avropa ABŞ-ın etibarlı müttəfiqidir. Əgər Vaşinqton, Aİ-nin təhlükəsizlik və müdafiə sahəsində daha aktiv sərmayələr etməsini və Amerikanın iqtisadiyyatının inkişafına dəstək verməsini istəyirsə, gömrük rüsumları tətbiq etməklə təzyiq göstərmək bu məqsədlərə mane olacaq.
Makron, Avropaya qarşı ticarət maneələrinin ABŞ-da inflyasiyanın artmasına və qiymətlərin yüksəlməsinə səbəb olacağını da əlavə edib. O, həmçinin xatırladıb ki, ABŞ üçün əsas iqtisadi təhdid Aİ-dən deyil, Çindən gəlir.
Fransa Prezidenti bu açıqlamaları ilə ABŞ-ın ticarət siyasətinin, Avropa ilə əməkdaşlığı inkişaf etdirmək əvəzinə, daha çox ziyan gətirə biləcəyinə diqqət çəkib.
