Soyuq hava anbarların tükənməsini sürətləndirdiyi üçün Avropada təbii qaz qiymətləri 2023-cü ilin fevralından bəri ən yüksək həddə çatıb. Marja xəbər verir ki, bu barədə Bloomberg agentliyi məlumat yayıb.
Analitiklər artıq dördüncü həftədir ki, qiymət artımını müşahidə edirlər. Mart fyuçersləri hər MVt üçün 58 avroya qədər artım göstərib.
Sinoptiklər yaxın gələcəkdə Avropanın şimal-şərqində soyuqların olacağını gözləyirlər. Bu, bazar iştirakçılarının fikrincə, qaza tələbatın daha da artmasına səbəb ola bilər.
Agentliyin məlumatına görə, tələbatın artması artıq Avropada yeraltı anbarlardakı qaz ehtiyatlarının səviyyəsinin azalmasına səbəb olub. 2024-cü ilin fevralında onlar 67% dolu idi, indi isə bu rəqəm 49% təşkil edir.
Fevralın 3-də bildirilib ki, “Türk axını” ilə Avropa İttifaqına qaz nəqli yanvarda rekord vurub. Kəmərlə nəql olunan qazın orta sutkalıq həcmi 50,2 milyon kubmetrə çatıb, bu ilk buraxılışdan bəri ən yüksək göstəricidir.
