Donald Tramp Ukraynada müharibəyə son qoymaq üçün Vladimir Putinlə telefon danışığı olduğunu desə də, ABŞ-ın “Wall Street Journal” (WSJ) qəzeti Moskvanın hərbi əsirlərə verdiyi sistematik işgəncələri işıqlandırıb.
Sankt-Peterburq həbsxanasının müdiri Ukraynadan gələn hərbi əsirlərlə bağlı söhbət düşəndə: “Onlara mərhəmət göstərməyin, amansız olun”, – deyib.
Məlumata görə, general-mayor İqor Potapenko müharibə başlayan kimi xüsusi təyinatlılara mühafizəçiləri toplayıb və normal qaydaların ukraynalı məhbuslara şamil edilmədiyini, zorakılığa heç bir məhdudiyyət olmadığını, digər həbsxanalarda olduğu kimi bədən kameralarına ehtiyac olmayacağnı, mühafizəçilər ayda bir dəfə öz vəzifə ərazilərini dəyişəcəklərini çatdırıb.
WSJ-nin bu gün dərc etdiyi eksklüziv hesabata görə, ukraynalı hərbi əsirlər üç ildir sistematik işgəncələrə məruz qalırlar. İşgəncələrə cinsi orqanlara elektrik cərəyanı qoşulması, maksimum ağrıya səbəb olan şiddətli fiziki zorakılıq və amputasiyaya səbəb ola biləcək qanqren daxildir.
Növbətçi ərazilərin daim dəyişilməsi səbəbindən sonradan tanınmayacaqlarını bilən mühafizəçilər hətta gözlərinə baxanları döyüblər.
Çılpaq arama, elektrik cərəyanı vurması, Rusiya himninin məcburi oxunması kimi təcrübələr standart hal alıb.
Ehtimal olunur ki, bunlar dindirmə zamanı əldə ediləcək məlumatları artırmaq və məhbusların geri qaytarılacağı təqdirdə yenidən döyüşmələrinin qarşısını almaq məqsədi daşıyır.
Xəbərin üç keçmiş həbsxana işçisinin, onların qaçmasına kömək edən şəxslərdən birinin, rəsmi sənədlərin və ukraynalı məhbusların ifadələrinə əsaslandığı vurğulanıb.
Bu üç məmur şahidlərin müdafiəsi proqramına salınıb və Beynəlxalq Cinayət Məhkəməsində (BCM) ifadə veriblər. İkisi deyir ki, Potapenkonun əmrləri “zorakılıq üçün boş çek” kimi qəbul edilib.
Biri deyirdi ki, özünü həmişə vətənpərvər kimi qələmə verib, amma müharibədən sonra həbsxanalarda baş verənləri görəndən sonra başqa ölkədə yaşamalı olub.
BCM Rusiyanı mülki şəxslərə hücum etməkdə və ukraynalı uşaqları zorla öz ərazisinə aparmaqda ittiham edir. Vladimir Putin də daxil olmaqla, azı altı rusiyalı məmurun həbsinə order verilib. Müharibə ilə bağlı digər araşdırmalar da davam edir.
Kremlin sözçüsü Dmitri Peskov Rusiya və Ukrayna ombudsmanlarının məhbuslarla rəftarla bağlı təmasda olduqlarını və işgəncə ilə bağlı ümumiləşdirmələrin aparıla bilməyəcəyini bildirib və “İşlərə fərdi baxmalısınız” deyib.
