Bir neçə gün əvvəl Serbiya Prezidenti Aleksandar Vuçiçin avtomobilinin təkərinin çıxması barədə məlumat saytların baş xəbəri oldu.
Avtosfer.az xəbər verir ki, indi qəzanın bəzi detalları üzə çıxıb. Xarici KİV-lərin məlumatına görə, prezidentin xidməti avtomobili Audi A8-in zirehli versiyasıdır. Avtomobilin kütləsi 3,5 tondur. Bu maşınlara adətən “Michelin PAX 255-720 R490” şinləri quraşdırılır. Böyük ehtimalla diskdə və ya təkərdə olan hansısa qüsur belə bir problemin ortaya çıxmasına səbəb olub. Zirehli avtomobillər ağır olduğu üçün təkərlər də tez sıradan çıxır. Bir qayda olaraq, prezident kortejində avtomobillər sürətlə hərəkət etdiyi üçün şinlərin dəyişmə tezliyi artır. Belə bir şinin 1 ədədinin qiyməti təxminən 8800 manatdır.
Ekspertlər sürücünün peşəkarlığını və avtomobilin özünü aparmasını xüsusi vurğulayıblar. 100 km/saat sürətlə gedən avtomobil təkər çəmbərdən çıxdıqdan sonra da ziqzaq cizməyib. Bu da texnikanın üstünlüyünü göstərir. Sürücü də avtomobili qısa müddətdə yolun sağına çəkərək saxlamağı bacarıb. Aztonajlı yük avtomobili çəkisində olan texnikanı bu sürətdə ram etmək hər sürücünün işi deyil. Şübhəsiz ki, o, xüsusi hazırlanmış şəxsdir.
Vüqar Yaşaroğlu
