Bakı, 11 fevral, AZƏRTAC
İlon Maskın rəhbərlik etdiyi investorlar konsorsiumu “ChatGPT” chatbotunun yaradıcısı olan “OpenAI” şirkətinə nəzarət edən qeyri-kommersiya təşkilatını almaq üçün 97,4 milyard dollar təklif edib.
AZƏRTAC “Financial Times” nəşrinə istinadla xəbər verir ki, milyarderin vəkili Mark Toberoffun sözlərinə görə, o, bazar ertəsi, fevralın 10-da “OpenAI”nin Direktorlar Şurasına müvafiq ərizə təqdim edib. İlon Maskın təklifi müqavilədən sonra “OpenAI” ilə birləşə bilən onun süni intellekt üzrə startapı “xAI”, həmçinin “Valor Equity Partners”, “Baron Capital”, “Atreides Management”, “Vy Capital” və 8VC daxil olmaqla bir neçə investor tərəfindən dəstəklənir.
Daha sonra “OpenAI” şirkətinin icraçı direktoru Sem Altman “X” platformasında yazıb: “Xeyr, təşəkkür edirəm, amma istəsəniz, biz “Twitter”i 9,74 milyard dollara alacağıq”.
O, həmçinin “Slack”da işçilərə mesaj göndərib: “Bizim strukturumuz heç bir şəxsin “OpenAI” üzərində nəzarəti ələ ala bilməməsini təmin edir. Bu, böyük irəliləyiş əldə etdikcə bizi zəiflətməyə çalışmaq taktikasıdır”.
Xatırladaq ki, İlon Mask “Twitter”i 2022-ci ildə 44 milyard dollara alıb. O, əvvəllər çinli sahibkara məxsus “ByteDance” ilə bağlı milli təhlükəsizlik narahatlıqlarına görə ABŞ-ın qadağan edəcəyi məşhur qısa video proqramı olan “TikTok”u almaqda maraqlı olmadığını bildirib.
Qeyd edək ki, Altman və Mask 2015-ci ildə “OpenAI” şirkətini təsis ediblər. 2019-cu ildə Mask şirkətdən ayrıldıqdan və Altman icraçı direktor olduqdan sonra “OpenAI”, həmçinin “Microsoft” və digər investorlardan pul toplayaraq kommersiya məqsədli törəmə şirkət yaratdı. “OpenAI” indi qeyri-kommersiya təşkilatından kommersiya təşkilatına keçmək üzrədir. Bu addım şirkətin daha yaxşı AI modellərini inkişaf etdirmək üçün kapital toplamaq ehtiyacı ilə bağlıdır.
