Çinin elektromobillər istehsalçısı BYD əvvəllər avtonom idarəetmə texnologiyası ilə bağlı ehtiyatlı olsa da, indi DeepSeek ilə əməkdaşlıq edərək sürücüyə yardım sistemlərinə geniş sərmayə qoymaq qərarına gəlib.
Marja.az xəbər verir ki, bu açıqlamadan sonra şirkətin səhmləri Honq Konq birjasında 4 faizdən çox bahalaşaraq rekord həddə çatıb və 345 Honq Konq dollarını (44,24 dollar) görüb. Keçən həftə, BYD-nin səhmləri təxminən 21 faiz dəyər qazanmışdır.
BYD-nin qurucusu və baş direktoru Wang Chuanfu canlı yayımda bildirib ki, qabaqcıl ağıllı sürücülük (idarəetmə) sistemləri artıq təhlükəsizlik kəmərləri və təhlükəsizlik yastıqları kimi standart təhlükəsizlik xüsusiyyətlərinə çevriləcək.
Avtomobil istehsalçısı elan edib ki, bütün avtomobillər sırasına "DiPilot" adlı sürücüyə yardım sistemi təklif edəcək. Həmçinin sistem 69 800 yuan (9 555 dollar) qiymətinə satışa çıxarılacaq ucuz avtomobildə də yer alacaq.
BYD bu baxımdan ilk Çin avtomobil istehsalçısı olacaq
Nomura analitiklərinin fikrincə, BYD-nin qiyməti 70.000 yuandan aşağı olan avtomobildə bu cür qabaqcıl sürücüyə yardım xüsusiyyətləri təklif edən ilk Çin avtomobil istehsalçısı olacağı gözlənilir. "BYD rəqabət strategiyasını dəyişir, keçən il qiymətlərin azaldılması strategiyasından 2025-ci ildə funksional təkmilləşdirmələrə keçir", - analitiklər bildirib.
Həmçinin BYD, Çin startapı "DeepSeek"in süni intellekt texnologiyasını yeni sürücüyə yardım sisteminin ən təkmil versiyasına inteqrasiya edəcəyini açıqlayıb. Bu cür sistemlər proqram təminatı, süni intellekt və kameralar və ya digər sensorlardan istifadə edərək avtomobili idarə edir və insan müdaxiləsinə ehtiyacı minimuma endirir.
"DeepSeek inteqrasiyası çox vacibdir, çünki indi BYD rəqibləri tərəfindən təklif olunanlara bənzər ağıllı xüsusiyyətləri təqdim etmək üçün öz yerli süni intellekt texnologiyası ilə işləyə bilər. Bu, BYD-ni texnoloji xüsusiyyətlərin sürətini təyin etmək mövqeyinə qaytarır",-"Auto Insights"ın təsisçisi və idarəedici direktoru Tu Le bildirib.
İki il əvvəl istifadəyə verilib
Çinin avtomobil istehsalçıları iki il əvvəl elektrikli avtomobil bazarında fərqlənmək üçün sürücüyə yardım sistemlərindən istifadə etməyə başladılar. Bununla belə, BYD rəhbərliyi 2023-cü ilin mart ayında verdiyi açıqlamada, “ağıllı idarəetmə”yə bağlı avtonom nəqliyyat vasitələrinin iştirakı ilə baş verən qəza zamanı məsuliyyətin müəyyən edilməsinin çətin olduğunu bildirmişdi. Bununla belə, onlar qabaqcıl yardımçı idarəetmə texnologiyalarının ümumi təhlükəsizliyi yaxşılaşdırmaq potensialına malik olduğunu etiraf etmişdilər.
BYD bazar ertəsi günü bildirib ki, ağıllı avtomobillər yol şəraitini izləyəcək və təhlükələrin qarşısını alacaq və texnologiya zamanla böyük verilənlər və süni intellekt modelləri sayəsində təkmilləşəcək.
BYD-nin yeni sürücüyə yardım texnologiyası ilə təchiz edilmiş 20-dən çox model satışa çıxarılıb.
Çində sürücüyə yardım proqramının yayılması tənzimləyici məhdudiyyətilə üzləşmişdi, lakin getdikcə yerli hökumət sürücüyə yardım proqramının sıx şəhər nəqliyyatında istifadəsinə icazə verir.
Tesla Çindən icazə ala bilməyib
Tesla-nın ən təkmil sürücü yardımı versiyası olan "Full-Self Driving", Elon Maskın 2024-cü ilin sonuna qədər Çində təqdim ediləcəyinə dair açıqlamalarına baxmayaraq, hələ də Pekindən təsdiq almayıb. Mask gecikməni ABŞ və Çin arasındakı məhdudiyyətlərlə izah edib.
DeepSeek inteqrasiyası BYD-nin rəqabət üstünlüyünü artırsa da, "Stansberry Research"ın analitiki Brian Tycangco qeyd edib ki, əməkdaşlıq "milli təhlükəsizlik zəminində BYD avtomobillərinin ABŞ kimi Qərb bazarlarına daxil olmasının daha çətin olacağı ehtimalını artırır".
Xəbər verdiyimiz kimi, elektromobil istehsalında ABŞ-ın Tesla şirkətinin ən böyük rəqibi olan Çin markası BYD, 9600 dollar qiymətinə satışa təqdim edəcəyi "Seagull" büdcə hetçbek modeli də daxil olmaqla, bütün avtomobil modelləri üçün inkişaf etdirdiyi yeni avtonom idarəetmə sistemini təqdim edib.
“Tanrının Gözü” (God's Eye) adlandırılan sistem tamamilə BYD-nin öz mühəndis komandası tərəfindən hazırlanıb və markanın kütləvi bazar modellərinə adətən lüks seqmentli avtomobillərdə olan uzaqdan parketmə və avtonom ötmə kimi qabaqcıl xüsusiyyətləri də əlavə edəcək.
