Lüks moda qrupu "Kering" (PRTP.PA) bildirib ki, çətin vəziyyətdə olan əsas brendi "Gucci" ardıcıl olaraq zəif satışlar göstərdiyi üçün qrupun yenidən böyüməyə qayıtması vaxt alacaq. Bundan əlavə, İtaliya brendini canlandırmaq üçün hələ də yeni baş dizayner təyin olunmayıb.
Bu gün səhmlərin ticarətə başlanğıcında "Kering"in dəyəri qısa müddətə yüksəlsə də, bu artım sonra azalıb. İnvestorlar şirkətin dönüş nöqtəsinə çata biləcəyinə ümid etsələr də, nəticələr hələ gözləntiləri tam doğrultmur.
Fransa qrupu bildirib ki, 2023-cü ilin oktyabr-dekabr aylarında satışlar əvvəlki ilin eyni dövrü ilə müqayisədə 12 % azalıb. Bunun əsas səbəbi "Gucci" satışlarının 24 % geriləməsidir. Bu marka "Kering"in ümumi satışlarının yarısını və təkrarlanan əməliyyat mənfəətinin üçdə ikisini təşkil etsə də, yenə də çətinliklərlə üzləşir. Bununla belə, qrupun daha kiçik brendləri, xüsusilə "Bottega Veneta", gözləntilərdən daha yaxşı nəticə göstərib.
"Bu nəticələr investorları sakitləşdirməlidir, çünki zəif bazar əhval-ruhiyyəsinə və daha əlverişli mövqelərə baxmayaraq, tendensiyalar tədricən yaxşılaşır", – "RBC" analitikləri qeyd edib.
"Gucci" geri dönəcək...
"Kering"in baş direktoru Fransua-Anri Pino bildirib ki, qrup artıq sabitləşmə nöqtəsinə çatıb və buradan etibarən tədricən böyüməyə davam edəcək.
"Gucci geri dönəcək. Buna qətiyyən şübhəm yoxdur" – Pino vurğulayıb.
Lakin o, əlavə edib ki, satışların 2025-ci ildən etibarən tədricən artacağı gözlənilir. Şirkət hazırda xərclərin optimallaşdırılmasına diqqət yetirir və bu il 1 800 mağazasından 50-sini bağlamağı planlaşdırır. Bağlanacaq mağazaların üçdə biri outletlər olacaq.
Xatırladaq ki, ötən həftə "Kering", "Gucci" dizayneri Sabato de Sarnonu vəzifədən azad edib.
Qrupun rəhbərləri onun yerinə kimin gətiriləcəyi barədə heç bir ipucu verməsələr də, De Sarnonun doğru seçim olmadığı iddialarını rədd ediblər. Onlar bildiriblər ki, De Sarno brendi yenidən klassik zərifliyə yönəltməkdə mühüm rol oynayıb.
"Bu gün biz irəliləməyə hazırıq və hazırda ehtiyac duyduğumuz yaradıcılığı təqdim etmək üçün yeni bir bədii rəhbər təyin etməyin zamanı çatıb" – Pino deyib. Rəhbərlik yeni dizaynerin tezliklə elan ediləcəyini bildirib.
Rəhim
