Texas Universitetinin Cənub-Qərb Tibb Mərkəzinin tədqiqatçıları müəyyən ediblər ki, çəkiyə nəzarət etmək və 2-ci tip diabetin müalicəsində istifadə olunan dərmanlar xroniki böyrək çatışmazlığı olan xəstələrdə ağırlaşma və ölüm riskini əhəmiyyətli dərəcədə azalda bilər.
HİT.az xəbər verir ki araşdırma "Nature Communications" (NatCom) jurnalında dərc olunub.
Sözügedən dərmanlar qlükaqona bənzər peptid-1 reseptor agonistləri (GLP1-RA) kimi tanınır. Onlar qan şəkərinin səviyyəsini idarə etməyə və arıqlamağa kömək edir. Yeni araşdırmada tədqiqatçılar onları diabet üçün də istifadə edilən, lakin o qədər də açıq təsiri olmayan başqa bir dərman sinfi, dipeptidil peptidaz-4 inhibitorları (DPP4i) ilə müqayisə ediblər.
Şəkərli diabet və xroniki böyrək xəstəliyi olan 64.000-dən çox xəstənin tibbi məlumatlarının təhlili göstərib ki, GLP1-RA qəbul edən insanların xəstəxanaya yerləşdirilmə ehtimalı daha azdır, böyrək çatışmazlığı daha yavaş olur və bütün səbəblərdən ölüm halları 16% azalır. Bu xüsusilə vacibdir, çünki bu şərtləri olan xəstələr ürək-damar xəstəlikləri, infeksiyalar və kritik dərəcədə aşağı qan şəkəri də daxil olmaqla müxtəlif ağırlaşmalara həssasdırlar.
Tədqiqatın aparıcı müəllifi Dr. İldiko Linqay deyir ki, diabet və böyrək xəstəliyi olan xəstələr tez-tez qabaqcıl müalicə üsullarından məhrumdurlar. Bununla belə, yeni məlumatlar göstərir ki, bu dərmanların terapiyaya daxil edilməsi onların vəziyyətini yaxşılaşdırmaqla yanaşı, təcili qəbulların sayını azaltmaqla xəstəxanaların yükünü də azalda bilər.
Alimlər ümid edirlər ki, onların işi xroniki böyrək xəstəliyinin müalicə qaydalarına yenidən baxılmasına səbəb olacaq və gələcəkdə bundan əziyyət çəkən minlərlə insana kömək edəcək.
Samir
