Süni intellektin inkişafı sayəsində 100 il əvvəl çəkilmiş və tarixi dəyər qazanan köhnə videolar və filmlər belə, müasir yüksək dəqiqlik standartlarına uyğun hala gətirilə biləcək.
Valyuta.az xəbər verir ki, süni intellekt əsaslı foto və video redaktə proqramları hazırlayan "Topaz Labs" şirkəti "Project Starlight" adlı yeni süni intellekt modelini təqdim edib.
Bu innovativ texnologiya köhnə və aşağı keyfiyyətli videoları "gözqamaşdıran yüksək dəqiqliyə" qaldırmaq üçün nəzərdə tutulub.
Yeni texnologiya necə işləyir?
"Topaz Labs" yeni texnologiyasını belə izah edir:
"Tamamilə yeni bir model arxitekturasına malik difüzyon əsaslı yanaşmamız 6 milyarddan çox parametrdən istifadə edir və ən son NVIDIA avadanlıqları ilə işləyir. Bu, indiyə qədər hazırladığımız ən dinamik və əhatəli video inkişaf metodudur".
Bir toxunuşla keyfiyyət artırılacaq
"Project Starlight" texnologiyası videoların detallı bərpasını təmin etmək üçün yüzlərlə kadrı analiz edir. Fotoşəkillərin süni intellektlə dəqiqliyini artırmaq nisbətən asan olsa da, video redaktəsi daha mürəkkəb prosesdir və adətən istifadəçilərdən çoxsaylı parametrlər daxil etməyi tələb edir.
Lakin "Topaz Labs"ın yeni modeli əl ilə tənzimləmə və mürəkkəb parametrlərə ehtiyac duymur. Texnologiyanın bu qədər sadələşdirilməsi sayəsində köhnə videoları yüksək keyfiyyətə yüksəltmək üçün sadəcə bir düyməyə basmaq kifayət edəcək.
Bu yenilik tarixi videoların və nostalji görüntülərin bərpasını asanlaşdıraraq, keçmişin daha aydın görünməsinə imkan yaradacaq.
Paşa Məmmədli
