ABŞ prezidenti Donald Trampın tarif (gömrük rüsumu) planlarını həyata keçirməsi qlobal bazarların istiqamətini müəyyənləşdirir. Vəzifəyə gəldikdən sonra Çinə 10 faiz əlavə gömrük rüsumu tətbiq edən Tramp, Kanada və Meksikaya tətbiq edilən tarifləri hələlik gündəmdə saxlayır.
Marja xəbər verir ki, Tramp öz iqtisadi və ticarət siyasətlərini seçki kampaniyası zamanı tez-tez vurğuladığı “Amerikanı yenidən möhtəşəm et” şüarına uyğun formalaşdırdıqca, əlavə tariflərin qlobal ticarətə mümkün təsirləri ilə bağlı narahatlıqlar artır. Tramp həmçinin ABŞ-dan bütün polad və alüminium idxalına 25 faiz rüsum tətbiq edən sərəncam imzalayıb.
Bu hadisələrdən sonra Trampın tariflərlə hədəf aldığı ölkələrin ABŞ iqtisadiyyatındakı mövqeyi və tariflərin iqtisadi nəticələri maraq mövzusu oldu.
İdxalda Meksika liderdir
Beynəlxalq Ticarət Mərkəzinin (ITC) məlumatlarına görə, ABŞ-ın ümumi idxalının 2024-cü ildə əvvəlki ilə nisbətən 6 faiz artaraq 3 trilyon 359,3 milyard dollara çatıb.
ABŞ idxalının ölkələr üzrə bölgüsünə baxdığımızda 510 milyard dollarla Meksika birinci yerdədir. Bu ölkənin ardınca 462,7 milyard dollarlıq idxalla Çin və 422,2 milyard dollarlıq idxal ilə Kanada gəlir. Bu dövrdə Meksika və Çindən idxal illik müqayisədə müvafiq olaraq 6 faiz və 3 faiz artıb, Kanadadan idxal isə 2 faiz azalıb.
Beləliklə, 2024-cü ildə ABŞ idxalının təxminən 42 faizi Çin, Kanada və Meksikadan olub.
Ən çox avtomobil və ehtiyat hissələri Meksikadan alınıb
Ötən il ABŞ Meksikadan cəmi 137,2 milyard dollar dəyərində avtomobil və onların ehtiyat hissələri, 105,9 milyard dollarlıq maşın və avadanlıqlar, 87,6 milyard dollarlıq elektrik maşın və avadanlıqları alıb.
Digər tərəfdən idxal artımlarına baxdığımızda ən böyük artım 24,2 milyard dollarla maşın və avadanlıqlarda olub.
İdxalın ən çox azaldığı mallar 8,2 milyard dollarla mineral yanacaq, 538 milyon dollar ilə mebel məhsulları, 486 milyon dollarla dəmir-polad materialları olub.
Ən çox elektrik maşın və avadanlıq Çindən alınıb
Ötən il ABŞ qlobal ticarətdə özünün ən böyük rəqibi kimi gördüyü və bir neçə dəfə “ticarət müharibəsi” apardığı Çindən 462,7 milyard dollarlıq mallar idxal edib. Çindən ən böyük idxal 127,1 milyard dollarla elektrik maşın və avadanlıqları olub. Növbəti böyük mal qrupları üzrə idxal - 85,1 milyard dollarla motorlu nəqliyyat vasitələri və ehtiyat hissələri, 32 milyard dollarla isə oyuncaqlar, idman avadanlığı və aksesuarlarıdır.
Mineral yanacaq ən çox Kanadadan idxal edilib
ABŞ keçən il Trampın əlavə tariflər tətbiq etməyi planlaşdırdığı Kanadadan 422,2 milyard dollar dəyərində mallar idxal edib. Kanadadan ən çox idxal edilən məhsullara baxdığımızda mineral yanacaqlar 131 milyard dollarla birinci yerdədir.
