Qazaxıstan Türküstanın ikinci ən böyük gölü olan Balxaşın qorunması üçün tədqiqat metodlarını inkişaf etdirir.
Hafta.az-ın “The Astana Times”a istinadən yazdığına görə, Qazaxıstanın Su Ehtiyyatları və Suvarma Nazirliyi son illərdə suyun çəkilməsi ilə üzləşən Balxaş gölünün mühafizəsi üçün Fransa İnkişaf Agentliyinin (AFD) ayırdığı 1,35 milyon avro kapitalın istifadəsi üçün iş planını müəyyənləşdirir.
2024-cü ilin dekabrında keçirilən Bir Su Sammitində Qazaxıstanın Su Ehtiyatları və Suvarma Nazirliyi, Fransa İnkişaf Agentliyi (AFD) və Fransanın Geoloji və Mədən Tədqiqatları Bürosu (BRGM) arasında Qazaxıstanın Balxaş gölünün mühafizəsi üzrə əməkdaşlığı inkişaf etdirmək üçün saziş imzalanıb.
Müqavilə çərçivəsində BRGM-nin gölün davamlı su idarəçiliyi üçün hərtərəfli tədqiqatlar aparması və strategiya hazırlaması qərara alınıb. Bununla belə, layihələndirilmiş tədqiqat metodlarına su ehtiyatlarını və sudan istifadənin mövcud vəziyyətini təhlil etmək üçün peyk hündürlük ölçmə və hidroloji modellərdən istifadə daxildir. Bundan əlavə, iqlim dəyişikliyinin və insan fəaliyyətinin təsirini nəzərə alaraq gələcək dəyişikliklərin modelləşdirilməsi planlaşdırılır.
Nazirlikdən həmçinin bildirilib ki, gölün səviyyəsinin optimallaşdırılması üçün tövsiyələrin hazırlanması məqsədilə gələcəkdə Balxaş gölünə daxil olan və ondan çıxan su axınının modelləşdirilməsi aparılacaq.
