Ekspert: Ortada kifayət qədər faktlar var. Rəsmi Bakı beynəlxalq praktikaya istinad edərək bu kəşfiyyat yuvasının fəaliyyətini dayandırıb
Xəbər verildiyi kimi, ölkələr arasında qarşılıqlı əməkdaşlıq prinsipinə və ikitərəfli əsasda əldə olunmuş razılaşmaların tələblərinə əməl etməyən, həm də hüquqi şəxs qismində qeydiyyatı olmayan “Rossotrudniçestvo”nun Azərbaycandakı nümayəndəliyi, yəni Rusiya İnformasiya-Mədəniyyət Mərkəzinin -“Rus evi”nin fəaliyyətinə xitam verilib. Artıq Bakıda “Rus evi”nin yerləşdiyi bina da boşaldılıb.
Məlum olub ki, bu təşkilat Azərbaycan qanunvericiliyini ciddi şəkildə pozaraq “Rusiyanın dünyada humanitar təsirini gücləndirmək” adı altında tamamilə başqa işlərlə, daha doğrusu, casusluqla, təxribatla məşğul olurmuş. Hətta “Rus evi” məramının guya zəif inkişaf etmiş ölkələrə dəstək göstərməkdən ibarət olduğunu bəyan edən, əslində isə geniş maliyyə imkanlarından istifadə etməklə “humanitar yardım” adı ilə müxtəlif dövlətlərin daxili işlərinə qarışan, həmin ölkələrdəki vəziyyəti öz istəyinə uyğunlaşdıran ABŞ Beynəlxalq İnkişaf Agentliyindən (USAID) heç fərqlənmirmiş.
Rusiya-Azərbaycan münasibətlərinin daha da gərginləşməsində maraqlı olan qüvvələr tərəfindən idarə olunan media orqanları, eləcə də bəzi şəxslər "Rus evi"ni bağlanması ilə bağlı ədalətli qərarı fərqli istiqamətdə yozmağa çalışırlar. Daha doğrusu, indiyədək törətdiyi əməllərə, o cümlədən dekabrın 25-də Azərbaycana məxsus təyyarəni vurmasına görə üzr istəməyən Rusiya tərəfi bu olaya özünəməxsus şəkildə cavab verməyə, daha doğrusu, anti-Azərbaycan təbliğatına başlayıb. Hətta velikorus şovinizmindən əziyyət çəkən həmin şəxslərin iddiaları heç bir əndazəyə şığmır. Məsələn, Rusiya Federasiyası Federal Məclisi Dövlət Dumasının Turizm komitəsinin sədrinin birinci müavini Nikolay Valuyev Rusiyadakı Azərbaycan diaspor təşkilatlarının bağlanması, azərbaycanlı miqrantların deportasiya edilməsi, vətəndaşlıq alanların Ukrayna cəbhəsinə göndərilməsi ilə bağlı təkliflərlə çıxış edib. O, eyni zamanda, Azərbaycan və xalqımız əleyhinə təhqiramiz ifadələr də işlədib. Amma əndazəni aşan bu şovinist və digərləri unudurlar ki, indiyə qədər Azərbaycan Rusiyaya qarşı tətbiq edilən heç bir sanksiyaya qoşulmayıb və bir çox strateji məsələlərdə onun ölkəsinin yanında yer alıb.
Bir məsələni də vurğulayaq ki, Nikolay Valuyev hakim “Vahid Rusiya” partiyasının üzvüdür. Görünür, Azərbaycanın müstəqil siyasət həyata keçirməsi və ədalətli tələbləri Moskvanı qane etmir. Ona görə də belə şəxsləri irəli verməklə ölkəmizə qarşı çirkin təbliğat kampaniyası həyata keçirir. Bu mənada başı boks zərbələrindən xarab olan bu boksçunun, yəni Nikolay Valuyevin sayıqlamaları Kremldən gələn göstərişlər kimi qəbul olunmalıdır.
Şübhəsiz, bu addımlar Moskvanın məkrli niyyətindən xəbər verir. Halbuki, bütün dünya da yaxşı bilir ki, Azərbaycanın heç bir dövlətlə münasibətləri gərginləşdirmək niyyəti yoxdur. Görünür, Rusiyanın hakim dairələri bu reallığı dərk etmək istəmirlər. “Rus evi”nin bağlanması isə ölkəmizin qanunvericiliyinə uyğun həyata keçirilib. Bəzi məlumatlara görə, “Rus evi”nin Rusiya kəşfiyyatı ilə də əlaqəsi olub. Elə bu səbəbdən bir sıra ölkələr Rusiyanın analoji "ev"lərini bir-birinin ardınca bağlayır. Səbəb casusluq fəaliyyətidir.
Mövzu ilə əlaqədar politoloq Fikrət Sadıxov “İki sahil”ə açıqlamasında bildirib ki, bu məsələdə Azərbaycan çox sağlam mövqe nümayiş etdirir: “Rəsmi Bakı beynəlxalq praktikaya istinad edərək bu kəşfiyyat yuvasının fəaliyyətini dayandırıb. Ortada kifayət qədər faktlar var. Ona görə də bu məsələ ətrafında belə hay-küy qaldırmağın heç bir mənası yoxdur. Çünki dövlətimiz maraq və mənafeyini birmənalı olaraq müdafiə edir. Şübhəsiz, bütün bunlar müstəqil siyasət yürüdən Azərbaycanın prinsipial mövqeyini həzm edə bilməməkdən irəli gəlir. O ki qaldı Nikolay Valuyevə, ölkəmizin əleyhinə fikirləri ilə əlaqədar onun adının Azərbaycan Respublikasına girişi qadağan edilmiş arzuolunmaz şəxslərin siyahısına daxil edilməsi tamamilə beynəlxalq praktikaya uyğundur”.
Qvami Məhəbbətoğlu, “İki sahil”
