Rusiya diktatoru Vladimir Putinlə heç bir danışıqlar Ukrayna, Avropa və ABŞ-ın vahid mövqeyi olmadan başlaya bilməz.
Bu barədə Ukrayna prezidenti Vladimir Zelenski Teleqramında məlumat yayıb.
Zelenski bildirib ki, Polşanın baş naziri Donald Tusk ilə telefon danışığı olub.
"Biz Ukraynada uzunmüddətli və həqiqi sülh üçün lazım olan şərtləri müzakirə etdik və razılaşdıq ki, Ukrayna, Avropa və ABŞ-ın vahid mövqeyi olmadan Putinlə heç bir danışıqlar başlaya bilməz", - prezident qeyd edib.
Zelenski həmçinin Tusku ABŞ prezidenti Donald Trampla söhbəti barədə məlumatlandırıb və onlar əsas mesajları və bütün Avropa üçün uğurlu nəticələr əldə etmək üçün bütün avropalıların mövqelərinin əlaqələndirilməsinin vacibliyini müzakirə ediblər.
"Mən vurğuladım ki, Ukrayna güclü mövqedən, güclü və etibarlı təhlükəsizlik təminatları ilə danışıqlar aparmalıdır və NATO-ya üzvlük tərəfdaşlar üçün iqtisadi baxımdan ən sərfəli olacaq. Digər mühüm təminat Ukraynanın müdafiə sənayesinə ciddi sərmayə qoyulmasıdır", - dövlət başçısı əlavə edib.
Zelenski həmçinin dünya liderlərinə Putinin müharibəni bitirməyə hazır olması ilə bağlı sözlərinə inanmamaq barədə xəbərdarlıq edib.
Əziz Mustafa, Oxuməni.az
