Ali Məhkəmədə "Rabitə işi" çərçivəsində həbs edilən keçmiş məmurlar Vidadi Zeynalov, Beytulla Hüseynov və Məhəmməd Məmmədov müsadirə olunmuş əmlaklarının geri qaytarılması ilə bağlı məhkəmə qərarından verilən kassasiya şikayətinə baxılıb.
Pravda.az-ın əldə etdiyi məlumata görə, hakim İlkin Rəcəbovun sədrliyi ilə keçirilən prosesdə qərar elan olunub.
Qərara əsasən, şikayət təmin edilməyib.
Qeyd: Həmin şəxslər əmlakların geri qaytarılması ilə bağlı məhkəməyə müraciət ediblər. Lakin birinci və apellyasiya instansiya məhkəmələri müraciətlərini təmin etməyib. Daha sonra Vidadi Zeynalov, Beytulla Hüseynov və Məhəmməd Məmmədovun ailə üzvləri qərardan kasssasiya şikayəti vermişdilər.
Vidadi Zeynalov Rabitə və Yüksək Texnologiyalar Nazirliyinin (indiki Rəqəmsal İnkişaf və Nəqliyyat Nazirliyi) Aparat rəhbəri, Beytulla Hüseynov "Bakı Telefon Rabitəsi" İstehsalat Birliyinin sədri, Məhəmməd Məmmədov isə "Aztelekom" MMC-nin baş direktoru vəzifəsində çalışıb.
Hər üç şəxs 2015-ci ildə "Rabitə işi" çərçivəsində korrupsiya cinayətlərində təqsirləndirilərək həbs edilib. Bakı Ağır Cinayətlər Məhkəməsinin hökmü ilə Vidadi Zeynalovla Beytulla Hüseynov 13 il müddətinə azadlıqdan məhrum edilib. Məhəmməd Məmmədova isə 5 il 7 ay 19 gün şərti cəza verilib.
Məhkəmənin qərarı ilə hər üç şəxsin əmlakları müsadirə edilib. Vidadi Zeynalovla Beytulla Hüseynov 2019-cu ildə azadlığa buraxılıb.
Kamal Məmmədov
