Gəncədə istehlakçıları xeyli miqdarda aldatma faktına görə cinayət işi başlanıb.
Baş Prokurorluğun Mətbuat xidmətindən "Report"un sorğusuna cavab olaraq bildirilib ki, Gəncə şəhər prokurorluğunda aparılan araşdırma nəticəsində ticarət (xidmət) sahəsində fərdi sahibkar qismində qeydə alınmış fiziki şəxs Arif Novruzovun tanışı Arzu Babayevlə birgə əldə etdiyi keyfiyyətli standartlarına uyğun olmayan alkoqollu içkilərin, kofe məhsulunun, habelə etiket məlumatlarını dəyişərək digər xarici ölkəyə məxsus istehsalçıya aid etiket məlumatlarını yapışdırdıqları kimyəvi yuyucu məhlulun qanunsuz olaraq dövriyyəsini həyata keçirmələrinə, bununla da istehlakçıları aldatmalarına əsaslı şübhələr müəyyən edilib.
Fakta görə Gəncə şəhər prokurorluğunda Cinayət Məcəlləsinin 200.1 (istehlakçıları aldatma və ya pis keyfiyyətli məhsul istehsal etmə və satma) maddəsi ilə cinayət işi başlanaraq istintaqın aparılması üçün Gəncə şəhər Baş Polis İdarəsinə göndərilib.
