Zəlzələlər yerin səthində ciddi dağıntılara səbəb olduğu kimi, yeraltı nəqliyyat sistemlərinə də təsir göstərə bilər. Xüsusilə metro kimi qapalı və sıxlıq olan mühitlərdə belə bir hadisə zamanı sərnişinlərin hansı risklərlə üzləşə biləcəyi maraq doğurur. Ekspertlər bildirir ki, zəlzələ zamanı metroda elektrik kəsilməsi, tunellərin zədələnməsi, havalandırma sisteminin pozulması və panika kimi təhlükələr meydana çıxa bilər.
Bəs belə bir vəziyyətdə nə etməli?
Yenisabah.az bu məsələni araşdırıb.
Zəlzələ zamanı yeraltı nəqliyyat vasitələrinin necə təsirlənə biləcəyi hər zaman maraq doğurur. Metro kimi qapalı və sıxlıq olan mühitlərdə zəlzələ baş verərsə, bir sıra təhlükələr ortaya çıxır.
Ekspertlərə görə, belə vəziyyətdə aşağıdakı risklər ortaya çıxa bilər:
Elektrik kəsilməsi – Zəlzələ enerji sisteminə zərər vurarsa, metro qatarları tunellərdə ilişib qala bilər.
Tunellərin zədələnməsi – Güclü yeraltı təkanlar tunellərdə çatlar yarada, hətta onların çökməsinə səbəb ola bilər.
Qatarların relsdən çıxması – Yeraltı titrəyişlər qatarların stabil hərəkətinə təsir edə, onların relslərdən çıxmasına gətirib çıxara bilər.
Havalandırma sisteminin pozulması – Tuneldə hava dövranı dayanarsa, sərnişinlər oksigen çatışmazlığı ilə üzləşə bilər.
Panik və izdiham – Qapalı məkanda zəlzələ zamanı insanlar panikaya düşüb nəzarətsiz şəkildə hərəkət edərsə, bu, izdiham və xəsarət riskini artırar.
Təhlükəsizlik mütəxəssisləri bildirir ki, belə bir vəziyyətdə ən vacib məqam sakitliyi qorumaq və rəsmi təlimatlara əməl etməkdir. Qatar tuneldə dayanarsa, sərnişinlər özbaşına qatarı tərk etməyə çalışmamalıdır, çünki tunel şəraitində bu, daha ciddi təhlükələrə yol aça bilər. Mütəxəssislər yeraltı nəqliyyatın zəlzələyə davamlı olması üçün metro sistemlərinin mütəmadi yoxlanılmasının vacibliyini vurğulayırlar.
Aytac Şahin
Telegram kanalımız
