“Bu elektrik şokudur. Bizə asimmetrik impulslar, xarici impulslar lazımdır. Aİ-nin başqa seçimi yoxdur. Avropanın sürətini artırması və hərəkətə keçməsi vaxtıdır”, - Fransa prezidenti bildirib.
Onun fikrincə, “həddindən artıq strateji qeyri-müəyyənlik” ABŞ-dən “strateji asılılığı” saxlamaq ümidində olan Avropa ölkələrini ayıltmağa kömək edəcək.
- Çin satış bazarının, təhlükəsizliyi təmin edən Amerika çətirinin və hasilatı dəstəkləmək üçün ucuz Rusiya qazının olduğu bir model var idi, amma indi hər üç məqamı unuda bilərik”, - Makron deyib.
Onun sözlərinə görə, Avropa müdafiəyə sərmayə yatırmaqla, geniş iqtisadi inteqrasiya və daha zəif tənzimləmə yolu ilə ÜDM-in artımına, beləliklə də “strateji oyanışa” nail ola bilər. Avropanın gələcək hərbi potensialı ona “ABŞ-nin iştirakı olmadan belə” hərəkət etmək imkanı verməlidir. Bu proses isə 5-10 il çəkəcək.
"Bizə tam inteqrasiya olunmuş avropalı müdafiə, sənaye və texniki baza lazımdır. Bu, müdafiə xərcləri ilə bağlı adi müzakirələrdən çox kənara çıxır. Əgər biz yalnız ABŞ-dən asılılığımızı artırsaq, o zaman 20 ildən sonra da Avropanın suverenliyi problemini həll etməyəcəyik”, - Fransa prezidenti narahatlığını gizlətməyib.
 |
| Avropa danışıqlar stolu arxasında yer "tələb" edir |
Avropanın özünün müdafiə qüvvələrinin yaradılması barədə Emmanuel Makronun səsləndirdiyi iddialar isə ilk dəfə deyil. Bir neçə gün əvvəl https://azvision.az/news/375505/--avropa-amerika-ile-sert-dialoqa-hazirdir--.html də bu “zərurəti” vurğulamışdı. Ümumiyyətlə, avropalı siyasətçilərin Avropanın NATO-dan kənar öz ordusunun yaradılması barədə az qala min dəfələrlə səsləndirdikləri bu bəyanatlar gəlişi gözəl sözlərdən başqa bir şey olmayıb.
Çünki təkbaşına Rusiyanın hərbi gücünə və Çinin iqtisadi-siyasi, habelə hərbi qüdrətinə duruş gətirə bilməyəcəyini anlayan “qoca qitə” ABŞ-nin qoltuğuna sığınmağın qaçılmaz olduğunu çox yaxşı bilir. Bu təhlükəsizlik çətirini təmin edən Vaşinqton isə vahid Avropa ordusunun təsisatı ideyasını birmənalı şəkildə rədd edir.
Sahil İsgəndərov
AzVision.az
