Qərb kəşfiyyat rəsmiləri İranın Çinin dəstəyi ilə ballistik raket proqramını canlandırdığını iddia edirlər. Adının açıqlanmasını istəməyən CNN-ə danışan Avropa kəşfiyyat rəsmiləri bildiriblər ki, raketlərdə bərk yanacaq kimi istifadə edilən kimyəvi maddə olan 1000 ton natrium perklorat daşıyan gəmi Çindən İrana doğru gedir.
Bildirilir ki, “Qolbon” adlı yük gəmisi təxminən 3 həftə əvvəl Çinin Cianqsu əyalətindəki Taicanq limanından yola düşərək, dünən İranın Bəndər Abbas şəhərinə çatıb.
Mənbələr bildirir ki, bu kimyəvi maddə ilə istehsal olunan bərk yanacaq təxminən 260 “Xeyber-Şəkan” və ya 200 “Həcc Qasim” raketini atmağa kifayət edəcək. Hər iki ballistik raket təxminən 1450 kilometr uçuş məsafəsinə malikdir.
Qəzza müharibəsi səbəbiylə artan gərginlikdə İsrail və İran arasında da qarşılıqlı hücumlar olub. İsrail ordusu oktyabr ayında İranın raket istehsalı obyektlərinə zərbələr endirib. CNN-in hesabatında iddia edilir ki, Tehran Çindən gələn kimyəvi maddələrlə raket proqramını yenidən aktivləşdirə bilər.
Kimyəvi maddələrin İran İnqilabı Keşikçiləri Korpusuna (SEPAH) bağlı bölmə tərəfindən qəbul edildiyi bildirilir.
Həmçinin bildirilir ki, “Ceyran” adlı daha bir yük gəmisinin də Çindən İrana getməsi gözlənilir. Bu gəminin də oxşar kimyəvi maddələr daşıya biləcəyi ehtimal edilir. Bildirilir ki, hər iki gəmi Tehran administrasiyasına aid olan İranın Dəniz Gəmiçiliyi şirkəti tərəfindən idarə olunur. Bu şirkət ABŞ və Böyük Britaniya tərəfindən sanksiya siyahısına salınıb.
Hesabatda həmçinin qeyd edilir ki, bu maddələrin tədarükü qanunsuz deyil və İrana qarşı sanksiyaları pozmur. Lakin “Qolbon” və “Ceyran” yük gəmiləri ABŞ tərəfindən sanksiya siyahısına salınıb.
Çin Xarici İşlər Nazirliyi verdiyi açıqlamada çatdırılmanın “təfərrüatları haqqında heç bir məlumatı olmadığını” bildirib və İrana qarşı tətbiq edilən sanksiyaları “birtərəfli və qeyri-qanuni” adlandırıb.
Digər tərəfdən, Amerika kəşfiyyatının bu həftə açıqladığı hesabatda İsrailin yaxın aylarda İranın nüvə obyektlərinə hücum etməyi planlaşdırdığı iddia edilib. Son zamanlar İranın hərbi infrastrukturunun “zəiflədiyi” və İsrailin bu vəziyyətdən istifadə etməyə çalışdığı bildirilib.
