Astronomlar günəş sistemimizdən cəmi 20 işıq ili uzaqlıqda, həyatı dəstəkləyə biləcək şəraitə malik ekzoplanetin mövcudluğunu təsdiqləyiblər. HD 20794 d adlanan bu planet yerin kütləsindən təxminən altı dəfə çox kütləyə malikdir və səthində maye suyun mövcud olmasına uyğun orbitdədir.HD 20794 d günəşə bənzər, lakin bir qədər kiçik və daha yaşlı bir ulduzun ətrafında fırlanır.Ulduzun yetkinliyi o deməkdir ki, planetin orbiti sabitləşə bilər. Bu, HD 20794 d-ni yaşamaq üçün potensial bir dünya edir.Kəşf haqqında danışan Oksford Universitetinin astrofiziki Maykl Kretignyer "Planetin varlığını təsdiqləmək böyük zövq idi. İlkin siqnal çox zəif idi, ona görə də əmin olmaq çətin idi. Bununla belə, onun cəmi 20 işıq ili məsafəsi gələcək kosmik missiyalar üçün perspektivli imkan yaradır" deyə qeyd edib.Astronomlar maye suyun mövcudluğunu həyatın əsas tərkib hissələrindən biri hesab edirlər. Planetin səthində maye suyun olması üçün onun ulduzuna nə çox yaxın, nə də çox uzaqda olması lazımdır. Bu şərtlərə cavab verən orbital bölgə yaşayış zonası adlanır.HD 20794 d-nin öz ulduzu ətrafındakı orbiti təxminən 648 gün çəkir və əsasən bu yaşayış zonasında yerləşir. Lakin onun elliptik orbiti bəzən planetin ulduzdan uzaqlaşmasına və səthinin temperaturunun əhəmiyyətli dərəcədə aşağı düşməsinə səbəb ola bilər.Alimlər HD 20794 d-nin dəqiq radiusunu ölçə bilmədiklərinə görə planetin sıxlığı və tərkibi haqqında dəqiq məlumata malik deyillər. Planetin radiusu daha kiçik olarsa, o, qayalı "Super-Yer" ola bilər. Ancaq daha böyükdürsə, sıx qaz təbəqələri olan "Mini Neptun" ola bilər.Bu naməlum məqamlar planetin yaşayış üçün yararlı olub-olmaması ilə bağlı qəti mühakimə yürütməyi çətinləşdirir. Lakin astronomlar gələcək müşahidələr vasitəsilə planetin atmosferini və səth şəraitini daha yaxşı başa düşməyə ümid edirlər."Mənim işim bu naməlum dünyaları araşdırmaqdır, lakin mən başqa alimlərin nə tapacağını öyrənməyə can atıram, xüsusən də bu planetin orbiti və onun yerə bənzəmə potensialı haqqında" deyə Kretignyer vurğulayıb.Kəşf haqqında elmi məqalə "Astronomy & Astrophysics" jurnalında dərc olunub.
