Keyt Uinslet ilk dəfə rejissor kürsüsünə oturacağı “Goodbye June” ailə dramı ilə karyerasında yeni səhifə açmağa hazırlaşır.
Hafta.az-ın yazdığına görə, Netflix üçün çəkiləcək filmin prodüseri və əsas rol oyunçusu da Uinslet olacaq. Filmdə onu Toni Kollette, Conni Flinn, Andrea Riseborux, Timoti Spall və Helen Mirren kimi ulduz adlardan ibarət heyət müşayiət edəcək.
Ssenarisi Uinsletin oğlu Coy Anders tərəfindən yazılmış “Goodbye June” filmi müasir Britaniyada cərəyan edir və qəfil, çətin vəziyyət qarşısında bir araya gələn parçalanmış qardaşların hekayəsindən söz açır.
Filmin çəkilişləri bu ilin sonunda Britaniyada başlayacaq.
Uinslet əvvəllər heç vaxt film rejissoru olmasa da, prodüserlik etdiyi və baş rolda oynadığı Linin rejissorluğunda son dərəcə aktiv rol oynadı və hətta Li BAFTA mükafatlarında ən yaxşı Britaniya filmi nominasiyasında namizəd oldu.
İlk dəfə “Screen Daily” tərəfindən açıqlanan xəbər, Uinsletin uzun müddətdir rejissorluq təkliflərini geri çevirdiyini, lakin indi film sənayesində qadın rejissorların varlığını artırmaq məsuliyyətini hiss etdiyini ortaya qoyur.
49 yaşlı Uinslet keçən payız Elizabet Deyin “How to Fail” podkastının qonağı olanda, daha əvvəl niyə rejissorluq etmədiyini və bu mövzuda hansı məsuliyyət hiss etdiyini deyib: “Film çəkilişlərində işlədiyim insanlar, istər aktyor olsun, istərsə də ekipaj üzvü, daim məndən soruşurlar ki, niyə rejissorluq etmirsən? Mən də cavab verirdim ki, yox, bu mənlik deyil. Amma indi, sənayedə mədəniyyətin dəyişdirilməsi zərurəti ilə, mənə elə gəlir ki, rejissorluq etməmək qadınlara xəyanətdir. Bunu içimdə getdikcə daha güclü eşidirəm”.
O, həmçinin qadın rejissorların sənayeyə daha çox cəlb olunmasının vacibliyinə diqqət çəkib və əlavə edib: “Qadın rejissorlar nə qədər çox olsa, bir o qədər çox insana ilham verə bilərik”.
Texniki məlumatlara yiyələnmək bacarığı sayəsində indi özünü bir film çəkməyə hazır hiss etdiyini ifadə edən Uinslet, "Düzgün necə ediləcəyini bilmədən heç vaxt bir işə cəhd etməzdim" deyib.
Uinslet sonuncu dəfə HBO-nun “Rejim” mini serialı ilə ekrana çıxdı və oradakı performansına görə “Qızıl Qlobus” nominasiyası aldı. Bununla da o, eyni mərasimdə birdən çox kateqoriya üzrə namizəd olma uğurunu qazanıb.
