Mərakeşdəki Assalam Dəniz İrsinin Mühafizəsi Cəmiyyəti ölkənin cənub sahillərində Birinci Dünya Müharibəsindən qalan doqquz batmış gəmi aşkar edib. Bu tapıntı Mərakeşin sualtı irsini sənədləşdirmək üçün apardığı əvvəlki işlərə əhəmiyyətli töhfədir.
Reyting.az xəbər verir ki, aşkar edilənlər Yaponiya, Norveç, Fransa, İngiltərə, Portuqaliya və İtaliya kimi müxtəlif ölkələrə məxsus gəmilərdən ibarətdir.
Bu gəmilər Birinci Dünya Müharibəsi zamanı alman sualtı qayıqlarının hücumları nəticəsində batıb. Alman sualtı qayıqları müharibə zamanı müttəfiqlərin hərbi və ticarət gəmilərini hədəf alaraq Mərakeşin cənub sahillərində ciddi itkilərə səbəb olub. Uzun illər itkin düşmüş bu gəmilərin yerinin müəyyən edilməsi bölgənin tarixinə işıq salır.
Assalam Dəniz İrsinin Mühafizəsi Cəmiyyəti tapılan gəmilərin ilkin koordinatlarını və təfərrüatlı hesabatlarını Mərakeş Milli Hidroqrafiya, Okeanoqrafiya və Dəniz Kartoqrafiyası Koordinasiya Komitəsi ilə paylaşıb. Bu mühüm qəza yerlərini qorumaq və gələcək tədqiqatları asanlaşdırmaq məqsədi daşıyır.
Ekspedisiya Mərakeşin dəniz irsinin sənədləşdirilməsi işinin davamıdır. Keçmiş işlərə Daxla yaxınlığında batmış Alman imperiya gəmisi olan Kaiser Vilhelm Der Grosse-nin yerinin tapılması, YUNESKO-nun dəniz irsi üzrə ilk proqramının işə salınması və Beynəlxalq Sahil Forumunun təşkili daxildir.
V. QULİYEV
