ABŞ silahsız Minuteman III qitələrarası ballistik raketini (ICBM) sınaqdan keçirib.
Reyting.az xəbər verir ki, bu gün Sakit okean vaxtı ilə saat 1:00-da Vandenberq Hərbi Hava Qüvvələri bazasından buraxılış həyata keçirilib.
Sınaq prosesinə 377-ci Test və Qiymətləndirmə Qrupu rəhbərlik edib.
“Bu sınaq buraxılışı Birləşmiş Ştatların nüvə qarşısının alınmasının təhlükəsiz, etibarlı və 21-ci əsrin təhdidlərinin qarşısını almaqda effektiv qaldığını nümayiş etdirmək və müttəfiqlərimizi əmin etmək üçün nəzərdə tutulmuş müntəzəm və dövri tədbirlərin bir hissəsidir”, - bazanın bəyanatında deyilir.
Hərbi Hava Qüvvələrindən bildiriblər ki, buraxılış ABŞ nüvə qüvvələrinin hazırlığına, dəqiqliyinə, öldürücülüyünə və effektivliyinə inamı təmin edir.
“Bu sınaq zamanı biz raket sisteminin cari imkanlarını qiymətləndirmək üçün performans məlumatlarını və digər əsas məlumatları toplayıb təhlil etdik. Bu, komandamıza proqnozlaşdırılan raket sisteminin təkmilləşdirmələrini təsdiqləyərkən mövcud sistemin dəqiqliyi və etibarlılığı barədə təhlil və hesabat verməyə imkan verir. Topladığımız və təhlil etdiyimiz məlumatlar Sentinel üçün yol açarkən Minuteman III-nün davam etdirilməsi üçün çox vacibdir”, - polkovnik Dustint Harmon bildirib.
Xatırladaq ki, bundan əvvəl ABŞ 2024-cü ilin oktyabr ayının əvvəlində Minuteman III qitələrarası ballistik raketini uğurla buraxıb. Nüvə yükü olmayan raket daha sonra ABŞ ordusunun Sakit okeandakı Marşal adalarında yerləşən raket əleyhinə müdafiə sınaq poliqonuna qədər təxminən 6800 km qət edib.
ELÇİN
