"General Motors" ("GM") bu gün rüblük dividendlərini 25% artıracağını və əlavə 6 milyard dollarlıq səhm geri alım proqramı həyata keçirəcəyini açıqlayıb. Bu addımlar artıq kapitalın səhmdarlara qaytarılması və şirkət dəyərinin artırılması məqsədi daşıyır.
Valyuta.Az "Reuters"ə istinadən xəbər verir ki, bu xəbərin ardından avtomobil istehsalçısının səhmləri bazar öncəsi ticarətdə təxminən 4,8% bahalaşıb.
ABŞ avtomobil istehsalçısı 2025-ci ilin ilk yarısınadək 2 milyard dollarlıq səhm geri alacağını, qalan məbləğin isə şirkətin qərar verdiyi istənilən vaxt alınacağını bildirib.
Şirkət qeyd edib ki, dividend artımı nəticəsində hər səhm üçün ödəniş 12 sentdən 15 sentə yüksələcək və bu dəyişiklik 2025-ci ilin aprelində planlaşdırılan növbəti dividend ödənişi ilə qüvvəyə minəcək.
"GM" 2023-cü ilin noyabrında dividend artımını və 10 milyard dollarlıq səhm geri alım proqramını elan etmişdi.
Şirkət IV rübdə həmin geri alım proqramını tamamladığını və açıq bazarda 87 milyon səhm geri aldığını bildirib. Rübün sonunda "GM"in dövriyyədə olan səhmlərinin sayı 995 milyona düşüb ki, bu da şirkətin səhmlərin ümumi sayını 1 milyarddan aşağı salmaq hədəfinə uyğun olub.
"GM" 2024-cü ilin iyun ayında daha 6 milyard dollarlıq səhm geri alımını təsdiqləyib, bunun 300 milyon dollarlıq hissəsi isə hələ icra olunmayıb.
Səhmdar dəyərinin artırılması və investisiyalar arasında balans
"Maliyyə strategiyamız çərçivəsində artıq kapitalı səhmdarlarımıza qaytarmağa və səhmlərin sayını daha da azaltmağa davam edəcəyik", – "GM"in baş maliyyə direktoru Pol Ceykobson ötən ay IV rüb üzrə gəlir hesabatında bildirib.
Şirkət səhmdar dəyərinin artırılması ilə güclü balans saxlamağı və elektrikli avtomobil (EV) modellərinin inkişafına sərmayə yatırmağı tarazlaşdırır. "GM"in elektrikli avtomobil seqmentindəki əməliyyat zərərlərinin bu il açıqlanmayan səviyyədən 2 milyard dollar azalacağı proqnozlaşdırılır.
"GM" 2025-ci il üçün 11,2 milyard dollardan 12,5 milyard dollara qədər xalis gəlir gözlədiyini açıqlayıb. Analitiklər isə "LSEG" hesablamalarına əsasən, şirkətin xalis gəlirinin 11,45 milyard dollar olacağını proqnozlaşdırır.
Şirkət 2025-ci il üçün kapital xərclərinin 10-11 milyard dollar aralığında olacağını gözləyir.
"GM" səhmləri son bir ildə təxminən 18% bahalaşıb ki, bu da ümumi bazarın "S&P 500" indeksinin artımına təxminən uyğundur.
Rəhim
