Azərbaycanda sahibkarlıq sahəsinin inkişafını daim dəstəkləyən “AccessBank” qadın sahibkarlığının dəstəklənməsi məqsədilə həyata keçirdiyi “Access2Success” layihəsinin üçüncü dəfə uğurla başa çatdığını elan edir. Layihə ölkəmizdə fərdi sahibkarlığın inkişafına böyük önəm verən Avropa Yenidənqurma və İnkişaf Bankının (AYİB) dəstəyi ilə həyata keçirilib.
Bu il “Access2Success” layihəsində 50 xanım iştirak edərək biznesin idarə edilməsi, satış və marketinq, emosional idarəetmə, liderlik bacarıqları və uğurlu biznesin hüquqi aspektləri kimi sahələrdə peşəkar bacarıqlarını genişləndirmək imkanı əldə etdilər. Təlimlər öz sahələrində təcrübəli və yüksək ixtisaslı mütəxəssislər tərəfindən keçirilib.
“Biz üçüncü dəfə uğurla həyata keçirdiyimiz və Azərbaycanda qadın sahibkarlara nəzərəçarpacaq faydalar gətirən “Access2Success” layihəsi ilə fəxr edirik. Qeyd etmək istərdim ki, “AccessBank”ın kredit portfelinin təxminən 20 faizi özünü etibarlı borcalan kimi sübut etmiş qadın sahibkarlara verilən kreditlərdən ibarətdir. “Access2Success” layihəsi hər il həyata keçirilir və məqsədimiz qadın sahibkarlığının inkişafını davam etdirmək və biznesin inkişafı üçün bərabər imkanların təmin edilməsidir. Biz əminik ki, bu layihə güclü sahibkarlıq mühitinin formalaşmasında mühüm rol oynayır və ölkənin iqtisadi inkişafına töhfə verir”, - deyə “AccessBank”ın İdarə Heyətinin sədri Davit Tsiklauri bildirib.
“Avropa Yenidənqurma və İnkişaf Bankı 2025-ci il üzrə Azərbaycanda iqtisadiyyatın şaxələndirilməsi, rəqabətqabiliyyətli özəl sektorun inkişafı, yaşıl iqtisadiyyata keçid və regional əlaqələrin təkmilləşdirilməsinə yönəlmiş Strategiyanı təsdiqləyib. Prioritet istiqamətlərdən biri qadınların və gənclərin rəhbərlik etdiyi bizneslərə dəstək verməkdir. Nəzərə alsaq ki, Azərbaycanda sahibkarlıq subyektlərinin yalnız 23 faizinə qadınlar rəhbərlik edir, onların iqtisadiyyata töhfəsini artırmaq üçün ciddi potensial görürük. Bu kontekstdə qadın sahibkarlar üçün biznes bacarıqlarının öyrədilməsi üzrə “AccessBank” ilə əməkdaşlığımız vacibdir”, - deyə AYİB-in KOB-ların maliyyələşdirilməsi və inkişafı qrupu, Türkiyə və Azərbaycan üzrə regional rəhbəri Serpil Çetinçift bildirib.
İlk “Access2Success” layihəsinə 2022-ci ildə start verilib və iştirak üçün 250-ə yaxın namizəd müraciət edib. Onlardan tələblərə cavab verən 53 nəfər təlimlərə qatılıb. Növbəti “Access2Success-2” layihəsi isə 2023-cü ildə həyata keçirilib. Bu layihədə 250-dən çox müraciət arasından seçilən 50 qadın qatılıb. İştirakçılar konsaltinq, turizm, təhsil, səhiyyə kimi sahələri təmsil edirdilər. 5 həftə davam edən “Access2Success” layihəsində qadın sahibkarlara biznesin strateji inkişafı, böhran zamanı idarəçilik, dövlət qurumlarına hesabatların təqdim edilməsi, satış, marketinq, elektron ticarət, kadrların idarə edilməsi və biznesə nəzarət mövzularında təlimlər keçirilib.
“Access2Success” qadınların maliyyə əlçatanlığı, məhdud biznes bilikləri və peşəkar inkişafa mane olan baryerləri aradan qaldırmağa kömək etmək məqsədi daşıyır. Proqram iştirakçılara biznesi uğurla idarə etmək və güclü biznes şəbəkələri qurmaq üçün lazım olan resursları və bilikləri hər il təmin etməyə davam edəcək.
“AccessBank” Azərbaycanın mikromaliyyələşdirmə bazarında lider olaraq, 2002-ci ildən kiçik və orta bizneslərə xidmət göstərir. Bankın səhmdarları sırasında Asiya İnkişaf Bankı, Avropa İnvestisiya Bankı, Beynəlxalq Maliyyə Korporasiyası kimi beynəlxalq təşkilat və qurumlar yer alır. Bankın 14-ü Bakıda, 21-i bölgələrdə olmaqla 35 filialı fəaliyyət göstərir və MKOB-lar üçün əlçatan maliyyələşdirmə imkanlarını təqdim etməyə davam edir. Filiallar haqqında əlavə məlumat linkdə təqdim edilir: http://bit.ly/accessbank-filiallar
Bankın xidmətləri haqqında daha ətraflı məlumat əldə etmək üçün 151 Əlaqə Mərkəzinə zəng etmək, həmçinin www.accessbank.az saytına və ya bankın müxtəlif sosial şəbəkələrdə olan səhifələrinə (feysbuk, instaqram, linkedin) müraciət edə bilərsiniz.
“AccessBank” QSC Azərbaycan Respublikası Mərkəzi Bankı tərəfindən 2002-ci il 25 oktyabr tarixli 245 saylı lisenziya əsasında fəaliyyət göstərir. Bankın baş ofisi Bakı şəhəri, Yasamal rayonu, Tbilisi prospekti 3 ünvanında yerləşir.
