"SoftBank Group"un qurucusu və baş direktoru olan yaponiyalı iş adamı Masayoşi Son 17 mlrd. dollar sərvətlə dünyanın ən varlı şəxslərindən biridir.
Valyuta.Az "Investopedia"ya istinadla xəbər verir ki, Son bu yaxınlarda "SB OpenAI Japan" adlı yeni bir layihəni elan edib. Bu, "OpenAI"nin baş direktoru Sam Altman ilə birgə yaradılan və Yaponiya şirkətləri üçün süni intellekt xidmətləri təqdim etməyi hədəfləyən birgə müəssisədir. Müqaviləyə əsasən, Son "OpenAI" texnologiyasından "SoftBank" şirkətlərində istifadə etmək üçün 3 mlrd. dollar ödəyəcək. O, eyni zamanda "OpenAI"yə 43 mlrd. dollara qədər sərmayə yatırmağı planlaşdırır ki, bu da "The Wall Street Journal"a görə, startup tarixində ən böyük investisiya ola bilər.
Bundan əlavə, "SoftBank" yanvar ayının sonunda Donald Trampın "Oracle" və "OpenAI" ilə birlikdə elan etdiyi 500 mlrd. dollarlıq birgə süni intellekt infrastrukturu layihəsinə də qoşulub.
Dünyanın ən nüfuzlu investorlarından biri hesab edilən Son indiyədək "Uber", "Yahoo!", "DoorDash", "Alibaba", uğursuzluğa düçar olan "WeWork" və bir çox digər şirkətlərə sərmayə qoyub.
"Bloomberg"in məlumatına görə, Sonun sərvəti təxminən 17 mlrd. dollardır. Bəs o, bu sərvəti necə əldə edib?
Masayoşi Son 1981-ci ildə "SoftBank Group"u yaradıb və onu süni intellekt, e-ticarət, robot texnologiyaları, peyk rabitəsi, marketinq və maliyyə sahələrində fəaliyyət göstərən qlobal investisiya nəhənginə çevirib.
Onun sərvətinin əsas mənbəyi "SoftBank"dakı 29%-lik payıdır. Son şirkətin ən böyük səhmdarıdır və 2024-cü ilin sentyabr ayına olan məlumata görə, 421 661 səhmə sahibdir.
"SoftBank" 2018-ci ilin dekabrında səhmlərini Tokio Birjasında satışa çıxarıb və ilkin kütləvi təklif (IPO) zamanı 21 mlrd. dollardan çox vəsait toplayıb.
Şirkət indiyə qədər bir sıra iri satınalmalar həyata keçirib. Məsələn, 2016-cı ildə "SoftBank" Böyük Britaniyanın çip dizaynı üzrə ixtisaslaşan "ARM Holdings" şirkətini 31 mlrd. dollara satın alıb. Hazırda "SoftBank" bu şirkətin 90%-nə sahibdir. "ARM Holdings" şirkətinin bazar dəyəri 173 mlrd. dollar təşkil edir ki, bu da "SoftBank"ın payının təxminən 155 mlrd. dollar dəyərində olduğunu göstərir.
"SoftBank" bu gün "Uber", "Chime", "Fanatics", "DoorDash", Hindistanın qida çatdırılma platforması "Swiggy", Cənub-Şərqi Asiyanın taksi xidməti "Grab" kimi 400-dən çox texnologiya şirkətinə investisiya qoyub. Bu sərmayələr əsasən "Vision Fund 1" və "Vision Fund 2" adlı süni intellekt və texnologiyaya yönəlmiş investisiya fondları vasitəsilə həyata keçirilir.
O, daşınmaz əmlaka da böyük sərmayələr yatırıb. O, 2012-ci ildə Kaliforniyanın Vudsayd şəhərində yerləşən 9 hektarlıq malikanəni 117,5 milyon dollara alıb. Bu, "San Francisco Business Times"ın məlumatına görə, ştatda satılmış ən bahalı evlərdən biridir.
Bundan başqa, milyarder 2013-cü ildə Tokiodakı məşhur "Tiffany" binasını 326 milyon dollara satın alıb və 2020-ci ildə onu açıqlanmayan məbləğə satıb.
Rəhim
