Bakı. TurkicWorld:
Bolqarıstan və Azərbaycan regionda enerji təhlükəsizliyinin gücləndirilməsinə yönəlmiş strateji enerji tərəfdaşlığını dərinləşdirmək niyyətindədirlər.
TurkicWorld xəbər verir ki, bunu bu gün Bolqarıstanın Bakıdakı səfiri Ruslan Stoyanov ölkənin Milli Azadlıq Gününə həsr olunmuş tədbirdə deyib.
Tədbirdə çıxış edən səfir, iki ölkə arasında enerji sahəsində əməkdaşlığın qarşılıqlı əhəmiyyətini vurğulayıb.
"Uzunmüddətli sazişə əsasən, Azərbaycan hazırda Bolqarıstanın illik qaz istehlakının demək olar ki, yarısını təmin edir. Biz enerji sektorunda əlaqələrimizi daha da gücləndirməyə sadiqik", - o deyib.
Səfir həmçinin, Bolqarıstanın Xəzər regionundan Avropaya “yaşıl” enerjinin ötürülməsində əməkdaşlığa maraq göstərdiyini bildirib ki, bu da hər iki ölkənin davamlı inkişaf məqsədlərinə uyğundur.
"Enerji sahəsində əməkdaşlıq strateji tərəfdaşlığımızın təməl daşı olaraq qalır və biz bu sahədə əməkdaşlığımızı genişləndirməyi səbirsizliklə gözləyirik", - Stoyanov əlavə edib.
