Prezident Donald Trampın administrasiyası Moskva ilə əlaqələri bərpa etmək və Ukraynada müharibəyə son qoymaq səyləri çərçivəsində Rusiyaya qarşı sanksiyaları potensial olaraq yumşaltmaq planı üzərində işləyir.
Yeniavaz.com xəbər verir ki, bu barədə “Reuters” məlumatlı mənbələrə istinadən məlumat yayıb.
Bildirilib ki, Ağ Ev Dövlət Departamenti və Maliyyə Departamentindən yüngülləşdirilə biləcək sanksiyaların siyahısını hazırlamağı xahiş edib. Qeyd olunub ki, siyahı ABŞ və Rusiya arasında planlaşdırılan danışıqların növbəti raundu üçün hazırlanmalıdır.
Nəşrin mənbələrinə görə, ABŞ Rusiyanın bəzi hüquqi və fiziki şəxslərinə, o cümlədən bir neçə oliqarxa qarşı sanksiyaları ləğv edə bilər. Vaşinqtonun sanksiyaların yüngülləşdirilməsi müqabilində Moskvadan konkret nə tələb edəcəyi hələlik bəlli deyil.
